УИХ-ын Тамгын газрын дарга Ц.Болдсайхан мэдээлэл хийлээ.

Өнөөдөр хурууны хээгээр ирц бүртгэх машин алдаатай ажилласан тул МАН-ын гишүүд ирцээ бүртгүүлж, санал өгөхөөс татгалзаж хоёр өдрийн завсарлага авсан. Өнөө өглөө МАН-ын гишүүн Ө.Энхтүвшин ирцээ бүртгүүлэхдээ "Yes" гэж дарсан ч "No" гэж гарсан байна. Мөн 10 эмэгтэй гишүүн байхад уг төхөөрөмжинд 17 эмэгтэй гишүүн ирсэн гэж гарчээ. Тиймээс ийм алдаатай, "но"-той төхөөрөмж ашиглаж болохгүй гэж МАН-ын гишүүд эрс эсэргүүцэж байгаа. Мөн хурууны хээгээр ирц бүртгэнэ гэсэн хууль батлаагүй байж хэрэгжүүлж эхэлж байгаа нь буруу хэмээн шүүмжилж байгаа юм.

Тэгвэл УИХ-ын Тамгын газраас уг асуудалд доорх тайлбарыг хийлээ. УИХ-ын Тамгын газрын дарга Ц.Болдсайхан энэ талаар ярихдаа “Хурууны хээгээр ирц бүрдүүлэхийг хуулиар тусгайлан зохицуулаагүй байгаа. Гэхдээ олгогдсон бүрэн эрхийнхээ хүрээнд УИХ-ын дарга хуралдааныг товлосон цагт нь эхлүүлж дэгийн дагуу зохион байгуулж, зөрчигдвөл таслан зогсоох гэсэн заалтын дагуу өнөөдөр хурууны хээгээр бүртгэж эхэлсэн. УИХ-ын гишүүд дэгийн тухай хуульд заасны дагуу хурал товлосон цагт биечлэн оролцох үүрэгтэй. Өнөөдрийн хуралдаанаар зарим нэг гишүүний микрофон ажиллахгүй байсан мөн санал хураах явцад алдаа гарсан гэж үзсэн учраас МАН-ын бүлэг завсарлага авсан. Завсарлага авсны дараа холбогдох хүмүүс системийг шалгасан юм. Тэгээд дэгийн тухай хуульд орж буй өөрчлөлтийг баталж гаргах хүртэл хурууны хээгээр бүртгэх системийг ашиглахаа болихоор боллоо. Харин  хууль батлагдвал шинэ системээр явна. Бид бүх микрофон, санал хураалтын системийг шалгаад МАН-ын бүлгийг УИХ-ыг 14.00 цагт хуралдуулах шийдвэрийг гаргуулахаар ажиллаж байна” гэв.