МАН-ын бүлгийн дарга С.Бямбацогт, гишүүн Ц.Нямдорж, Д.Лүндээжанцан нар мэдээлэл хийлээ. Тэд өнөөдөр чуулганы хуралдаан дээр завсарлага авсан шалтгаанаа тайлбарласан юм.

Энэ талаар УИХ дахь МАН-ын бүлгийн дарга С.Бямбацогт ярихдаа “Хурууны хээ унших машины нь алдаатай уншдаг, эвдэрхий тоног төхөөрөмж байсан. Хурууны хээгээр ирц бүртгэх асуудлыг хууль баталж байж хэрэгжүүлэх ёстой байсан. Гэтэл тэгсэнгүй. Энэ нь хууль зөрчсөн үйлдэл юм. Манай намаас санаачилсан хуулийг нэг жил өнгөрч байхад хэлэлцдэггүй мөртлөө гурван хоногийн өмнө барьсан эрх баригч намын гишүүдийн санаачилсан хуулийг одоо хэлэлцэх гэж байна. Тиймээс бидэнд ялгавартайгаар хандаж байна” гэв. Мөн намаас нь болж гишүүдэд ялгамжтайгаар хандаж буй учраас завсарлага авч буйгаа онцолсон бөгөөд цаашид энэ алдаагаа засч залруулах ёстой гэв.

Харин энэ талаар Ц.Нямдорж үргэлжлүүлэн Ардчилсан намынхан асуудлыг олонхиор түрий барьж, хуульгүйгээр асуудал бүрийг шийддэг гээд "УИХ-д олонхийг бүрдүүлж буй Ардчилсан намынхан, УИХ өнөөдрийн байдлаараа байвал сөрөг хүчний зүгээс дараа дараагийнхаа алхамыг хийх нөхцөлд хүрэх нь. Парламентыг тараах тухай асуудал ч яригдах нөхцөл байдалтай байна" гэв.