Сангийн сайд Ч.Улаан, Эдийн засгийн хөгжлийн сайд Н.Батбаяр нарыг огцруулах асуудал шоу болоод өнгөрлөө. Н.Батбаярыг намынхан нь цээжээрээ хамгаалсан бол Ч.Улааныг “Шударга ёс” эвслийнхэн өмгөөллөө. Гэхдээ “Шударга ёс” эвслийнхэн Ч.Улаан сайдыг өмөөрөхдөө тун сонирхолтой шалтгаан хэлж байна.

   Өнөөдөр эдийн засгийн байдал хүндэрсэн нь үнэн. Мөн зарим төрийн байгууллагууд цалингаа тавьж чадахгүйд хүрсэн. Ч.Улаан сайдын хувьд төсөв бүрдүүлэх тал дээр хариуцлага алдсан гэдгийг тэд хүлээн зөвшөөрсөн. Харин ийм байтал яагаад Ч.Улаан сайдыг огцруулахгүй, авч үлдэх ёстой вэ гэдэгт ийм тайлбар хийжээ. УИХ-ын гишүүн Ц.Оюунбаатар “Ч.Улаан бол Монгол улсын Сангийн яамыг хамгийн олон удаа тэргүүлсэн хүн. Хамгийн олон жил ажилласан хүн. Монгол улсын төсөв, санхүүгийн тогтолцоог Ч:Улаан сайд шиг мэддэг хүн одоо УИХ-д алга. Энэ хүнийг огцруулахаар өөр хүнд ажлыг нь өглөө гэж бодоход байдал илүү сайжирна гэдэг хэцүү” гэжээ. Өөрөөр хэлбэл тэд Сангийн сайдын ажлыг Ч.Улаанаас өөр хийж чадах хүн байхгүй тул огцруулж болохгүй гэсэн байр суурьтай байна. Бүр ямар ч алдаа дутагдал гаргасан тэр шүү дээ. Өнөөдөр төсөв бүрдээгүйн буруу нь Ч.Улаан сайдынх ч энэ хүн “дархан цаазтай” нэгэн тул доод албан тушаалтнууд буюу агентлагуудын дарга нарт хариуцлага хүлээлгэх нь зүйтэй гэсэн утга бүхий тайлбар хийжээ.

   Ямар ч улс оронд олон жил ажилласнаар нь сайдын суудлыг өгдөггүй. Ерөнхийлөгчийг хүртэл улиран сонгогдох хугацааг заасан байдаг. Гэтэл Ч.Улаан сайдыг “олон жил ажилласан” гэдэг шалтгаанаар энэ суудалд нь тогтоон барина гэж тайлбарлаж байгаа нь инээдтэй хэрэг. Тэгсэн хэрнээ Ц.Оюунбаатар гишүүн Эдийн засгийн хөгжлийн сайд Н.Батбаярын ажлыг шалгах хэрэгтэй гэжээ. Тэрбээр Чингис бондын мөнгө хаагуур, яаж урсаад байгаа нь асуудалтай тул шалгуулах хэрэгтэй гэсэн байх юм. Эрх баригч намтай эвссэн, Засгийн газарт орсон нам ийм хачирхалтай зүйл яриад сууж байна. Ерөнхийлөгчийг хүртэл хоёроос дээш удаа улираан сонгодоггүй байтал намынхан нь Ч.Улааныг насаар нь Сангийн сайд байлгах "алтан загасны" хүсэлтэй сууж байна.