УИХ-ын хямрал зөрчил дээд цэгтээ хүрлээ. УИХ-ын болоод байнгын хороодын ирц ч бүрдэхээ байв.  Энэ УИХ-ын чуулган ганцхан удаа цагтаа эхэлсэн. Тэр нь шинэ гишүүд тангараг өргөх гэсэн анхны хуралдаан байсан талаар саарал ордныхон ярилцах болов. Түүнээс хойш дандаа хугацаа хожимдож эхэлдэг эсвэл ирц бүрдэхгүй гэдэг шалтгаанаар хуралдахаа байжээ.
   Энэ тухай УИХ-ын гишүүн Ц.Нямдорж “УИХ-ын түвшинд ч,  байнгын хорооны түвшинд ч ирц бүрдэхээ байсан. Аль ч байнгын хороогоор ороход 3-4 хүн сууж манаачийн үүрэг гүйцэтгэдэг. Бусад нь хаашаа зугаалаад явчихсан нь мэдэгдэхээ байсан. 2014 оны төсөв,  мөнгөний бодлогыг баталсны дараа УИХ хийх ажилгүй болсон. Бүр болохгүй бол тав дахь өдөр Ерөнхий сайдын мэдээллийг сонссон дүр исгэж олон түмнийг хуураад л. Иймэрхүү л байдалтай байна. Зөвшилцөл гэдэг юм байхгүй болсон. Ойлголцол бас байхгүй болсон.
   УИХ-ын дарга АН-ын бүлгийн дарга шиг ажиллаж байгаа учраас парламентын дотоод хямрал улам гүнзгийрээд байгаа юм. Парламентын хямрал, сульдаа дээд цэгтээ хүрчихлээ. Засгийн газартаа хяналт тавьж чаддаггүй. Сайдууд нь эрхэлчихсэн. Өнөөдөр УИХ Засгийн газрын хүссэн бүхнийг хийдэг, хяналт тавих үүрэгээ алдчихлаа. Үүнд нь Засгийн газрын гишүүд эрэмшээд ажлаа хийхээ больсон. Төсвийн орлогыг триллионоор нь тасалдуулдаг, триллион төгрөгийн хөрөнгө оруулалт хийж чаддаггүй, тэгсэн мөртлөө гаднаас зээл авч амиа аргацаадаг ийм байдал бий болчихлоо. Ийм асуудал болж байгаа учраас УИХ хурууны хээний машин нэвтрүүлэх биш тарах тухай асуудлаа яриач ээ. Болохгүй бүтэхгүй бүх юмны эхлэл энэ УИХ-ын бүрэлдэхүүнд байна. Өнөөгийнх шиг дарга нь олонхи цөөнхийг ноцолдуулдаг ийм удирдлагатай парламент түүхэнд байгаагүй. Эцсийн дүндээ ард түмэн энэ парламенттай хариуцлага тооцох цаг болсон” хэмээн ярьж байна.

   Өөрөөр хэлбэл парламентын хямрал гүзгийрсэн учир УИХ-ыг тарах ёстой гэсэн байр суурийг дотроосоо анх удаагаа хөндөн тавьж эхэллээ. Магадгүй УИХ-ын ирц бүрдэхгүй энэ байдлаараа сунжирвал ард түмэн ч гэсэн тарахыг шаардаж мэдэх юм. Нөгөө талаараа парламентыг ингэж хямралд хүрэхэд хамгийн их нөлөөлж байгаа хүн нь УИХ-ын дарга З.Энхболдыг гэж Ц.Нямдорж гишүүн онцлон хэлж байна.
   Ийнхүү МАН-ынхан Засгийн газрын хоёр сайдыг огцруулах асуудлыг хөндсөний дараа парламентыг ч гэсэн тараах талаар тодорхой санаачилгуудыг өрнүүлж мэдэхээр болов.