УИХ-ын гишүүн Ж.Батзандангийн ах Ж.Батсүрэн гаалийн ажилтныг ажлаас нь халуулна хэмээн сүрдүүлсэн тухай мэдээлэл гарсан. Төрийн өмчит "Монсам" компанийн захирал тэрбээр  гаалиар авч гарах барааныхаа татварыг төлөхгүй хэмээн танхайрсан. Тэгвэл УИХ-ын гишүүн Ж.Батзандан гишүүн өнөөдөр төрсөн ахыгаа ингэж бүдүүлэг зан гаргасных нь төлөө ажлаас нь халж, нэн даруй хариуцлага тооцохыг хүслээ.
   Төрсөн ахыгаа ажлаас нь халуулж өгнө үү гэсэн ийм хүсэлт гаргасан төрийн албан тушаалтан өмнө нь байгаагүй. Харин ч томилуулах гэж улаан цайм зүтгэдэг. Тиймээс Ж.Батзандан гишүүнийг "шударга" хүн гэж дүгнэх нэгэн байхад шоу хийлээ хэмээн шүүмжлэх нэгэн ч байна. Ямартаа ч гишүүн дүүтэйгээрээ онгирсон Ж.Батсүрэнгийн ажилдаа үлдэх эсэх нь эрхэм гишүүний нэр хүндийг тодорхойлох нь.