Дархан-Уул аймгийн АН-ынхан өлсгөлөн зарлахаар бэлтгэж байгаа талаараа өнгөрсөн баасан гаригт албан ёсоор мэдэгдсэн. Тэгвэл тэд өчигдрөөс өлсгөлөн зарлаж эхэлсэн байна. Өлсгөлөнд Шинэчлэх хөдөлгөөний тэргүүн Л.Наранбаатар тэргүүтэй 11 хүн оролцож байна.

Энэ талаар Л.Наранбаатар "Бидний тэмцэл намын дотоод асуудал мэт болов ч үнэндээ тийм биш юм. Энэ бол Ардчилалыг өмчилж авсан бүлэглэлтэй хийж буй тэмцэл. Д.Сосорбарам гавъяатын хэлсэн үг өнөөдөр Дархан уул аймагт байгаа бодит жишээ. МАН засгийн эрх барьж байхад авилгачид шургалж орж ирсэнээс элгээрээ хэвтсэн. Ардчилсан нам МАН-ын алдааг давтах ёсгүй. АН эрүүл тунгалаг, дотоод ардчилалтай байж гэмээнэ авилгачид, эрүүгийн элементүүдийг намд шургалж, улс төрийн эрхэнд гарах боломжийг хаана. Дарханы АН ийм сул дорой, хэдхэн бүлэг хүний өмч болчихсон байхад 2016 он, 2020 онд эрүүгийнхэн Дарханы АН-ын хороогоор дамжиж улс төрд орохыг үгүйсгэхгүй. Тийм учраас өөрчлөлт шинэчлэлт яг өнөөдөр хэрэгтэй байна" гэв.

Тэд өнгөрсөн долоо хоногт намын байрныхаа гадна эсэргүүцлийн жагсаал хийсэн.

Дарханы Ардчилсан намынхан АН-ын Ерөнхий нарийн бичгийн дарга Ц.Оюундарьд шаардлага хүргүүлсэн ч энэ шаардлагын хариуг одоо болтол өгөхгүй байгаа учраас ийнхүү жагсаал хийж, өлсгөлөн хийхээр болжээ. Шаарлагын хариуг хүлээж автал тэд эсэргүүцлээ зогсоохгүй гэдгийг мөн сануулж байна.

Тэд мөн "Дархан-Уул аймгийн АН-ын эв нэгдлийг хангах, үйл ажиллагааг сайжруулах, Монгол улсын Ерөнхийлөгчийн сонгуульд амжилттай оролцох зорилгоор АН-ын ЕНБД болон аймгийн АН-ын тухайн үеийн удирдлагуудын хооронд 2013 оны 4-р сарын 13-ний өдөр  зургаан талт тохиролцоо хийсэн. Тус тохиролцооны дагуу Дарханы АН-ын хороо, түүний удирдлага зохион байгуулалтыг өөрчлөн хэрэгжүүлэхийг АН-ын Хяналтын Ерөнхий хорооны 2013 оны 11-р сарын 18-ны өдрийн хурлын №02 тоот тогтоолоор АН-ын Хэрэг Эрхлэх газарт даалгасан. 2013 оны 11-р сарын 19-ний өдөр ЕНБД Ц.Оюундарь, Нарийн бичгийн дарга Батсуурь нар ДУА-т ажиллаж, тохиролцооны талуудыг байлцуулан намын гишүүдтэй уулзаж, Хяналтын Ерөнхий хорооны шийдвэрийг хэрэгжүүлэх талаар санал солилцсон. Уг уулзалтад намын 400 гаруй гишүүн ирж үзэл бодлоо илэрхийлсэн бөгөөд анхан шатны үүрүүдэд сонгууль явуулж, аймгийн намын хороо, түүний удирдлага зохион байгуулалтыг шинэчлэхийг олонхийн саналаар дэмжсэн. Хяналтын Ерөнхий хорооны шийдвэр гараад багагүй хугацаа өнгөрсөн боловч Дархан-Уул аймгийн намын хороо, түүний удирдлага, зохион байгуулалтыг өөрчлөх талаар шийдвэртэй алхам хийгдэхгүй байгаа тул шаардлагынхаа хариуг биелүүлэхийг ийнхүү шаардаж байгаа" гэх албан тайлбарыг өгч байгаа юм.