Бангкок хотноо 12 дугаар сарын 20-ны өдөр өндөрлөсөн Ази, Номхон далайн орнуудын Эдийн засгийн хамтын ажиллагаа, интеграцчлалын асуудлаарх Сайд нарын бага хуралд оролцож буй бүс нутгийн 30 гаруй орны төлөөлөгчид “Ази, Номхон далайн бүс нутгийн орнуудын эдийн засгийн хамтын ажиллагаа, интеграцчлалын тухай Бангкокийн тунхаглал”-ыг баталлаа.Ази, Номхон далайн эдийн засаг нийгмийн комисс (АНДЭЗНК)-оос зохион байгуулж буй тус хуралд Монгол Улсаас Гадаад хэргийн дэд сайд Д.Ганхуяг тэргүүтэй төлөөлөгчид оролцсон юм.
Ази, Номхон далайн бүс нутагт дэлхийн хамгийн түргэн хөгжиж буй улс орнууд оршдог боловч тэд глобал эдийн засгийн хямралын гадна үлдээгүй ба бүс нутгийн орнууд хооронд хөгжлийн ялгаа зааг их байдаг. Ази, Номхон далайн бүсэд 743 орчим сая хүн өдөрт 1.25-аас доош ам.долларт багтаан амьжиргаагаа залгуулж байгаа бол түүнээс хоёр дахин олон хүн өдөрт 2 хүрэхгүй ам.доллар зарцуулан амьдарч байна. Тийм учраас “тус бүс нутагт ядуурал ба өлсгөлөнг эцэс болгох, Ази, Номхон далайн бүс нутгийн эринийг бодит зүйл болгох, бүс нутгийн бүх улс орныг хамарсан тогтвортой хөгжлийг дэмжихийн тулд бүс нутгийн эдийн засгийг интеграцчлах асуудал онцгой чухал тавигдах ёстой”-г АНДЭЗНК судалгааны илтгэлдээ дурджээ.
Бангкокийн тунхаглалд Ази, Номхон далайн бүс нутгийн орнуудыг ойртон нягтруулах буюу харилцан ашигтай хамтын ажиллагааг хөгжүүлэх, нэгдмэл зах зээлийн төлөөх санал санаачилгыг дэмжих, зам тээврийн болон интернет орон зайн холбоо харилцааг нэмэгдүүлэх, эмзэг байдал, сул тал ба эрсдэлээ хамтран шийдвэрлэх бодлого, арга хэмжээний хүрээг заасан, эдгээрт чиглэсэн санал санаачилгыг уриалан дуудсан заалтууд оржээ.
Сайд нарын уулзалтын өмнө 2013 онд болсон мэргэжилтнүүдийн хоёр удаагийн зөвлөлдөх уулзалтаас Бангкокийн тунхаглалын төслийг боловсруулсан юм. Тэдгээр уулзалтад манай холбогдох яамдын мэргэжилтнүүд оролцож, Монгол Улсын байр суурийг тусгаж ажилласан болно.
Ази, Номхон далайн орнуудын Эдийн засгийн хамтын ажиллагаа, интеграцчлалын Сайд нарын хоёрдугаар бага хурлыг 2015 оны 12 дугаар сард хийхээр тогтов.
Сайд нарын бага хурлын үеэр Зүүн Тимор улсын ерөнхийлөгч асан Нобелийн шагналт Хосе Рамос-Хорта “Ази, Номхон далайн эринийг цогцлоохын тулд бүс нутгийн эдийн засгийг интеграцчлах хэрэгцээ шаардлага: Зүүн Тиморын жишээ” сэдвээр сонирхолтой лекц уншлаа. Мөн АНДЭЗНК-оос эрхлэн гаргадаг Ази, Номхон далайн эдийн засаг, нийгмийн 2013 оны судалгааны илтгэлийн шинэчилсэн хувилбарын танилцуулга-нээлт болов. Дашрамд дурдахад, АНДЭЗНК-оос бүс нутгийн цаг үеийн чухал асуудлуудаар сэдэвчлэн 1947 оноос хойш тасралтгүй гаргаж буй Ази, Номхон далайн эдийн засаг, нийгмийн судалгааны илтгэлүүдийг цахим хэлбэрт оруулж тус байгууллагын веб хуудас дээр тавьснаа зарлалаа.
Мөн хурлын үеэр манай төлөөлөгчдийн тэргүүн Гадаад харилцааны дэд сайд Д.Ганхуяг Маршаллын арлуудын бүгд найрамдах улсын төлөөлөгчдийн тэргүүн, Онц бөгөөд бүрэн эрхт элчин сайд Том Кижинертэй уулзаж хоёр улсын хооронд дипломат харилцаа тогтоох асуудлыг ярилцав. Маршаллын арлууд улсын зүгээс Монгол Улсын саналд талархалтай хандаж, ойрын үед дипломат харилцаа тогтоохоор ажиллаж буйгаа Элчин сайд Том Кижинер мэдэгдэв.
