Өнөөдрийн хуваарийн дагуу УИХ дахь МАН-ын бүлэг хуралдаж энэ долоо хоногт УИХ, байнгын хороодоор хэлэлцэх хуулийн төслүүдийг хэлэлцсэн байна. УИХ дахь МАН-ын бүлгийн ээлжит хуралдаанаар хэлэлцсэн асуудлын талаар УИХ дахь МАН-ын бүлгийн дарга С.Бямбацогт, дэд дарга Д.Оюунхорол, УИХ-ын гишүүн Б.Бат-Эрдэнэ, Д.Лүндээжанцан нар сэтгүүлчдэд мэдээлэл өглөө. 


Хурлаар Сангийн сайд Ч.Улаан, Эдийн засгийн хөгжлийн сайд Н.Батбаяр нарыг огцруулах ёстой гэдэг дээр МАН-ын бүлгийн гишүүд дахин саналаа нэгтгэсэн байна. Учир нь эдгээр сайдуудыг хууль зөрчсөн хэмээн үзэж байгаа аж. Тодруулбал, Н.Батбаяр сайд дөрвөн хуулийн 13 заалтыг зөрчсөн бол Ч.Улаан сайд дөрвөн хуулийн 14 заалтыг зөрчсөн гэнэ.  Мөн хурууны хээгээр ирц бүртгэх төхөөрөмж  буруу ажилласнаас болж бүлэг завсарлага авсныг АН-ын зүгээс МАН-ын бүлгийн буруу мэтээр олон нийтэд ойлголт төрүүлсэн гэв.

Өнөөдрийн хурлаар авч хэлэлцсэн бас нэгэн асуудал нь төрөөс халамжийн бодлогыг зорилтод бүлэг болгож иргэн бүрт 21 мянган төгрөг өгдөг байсныг дахин олгож эхлэх асуудлыг сэргээх асуудал аж. Иргэдийн амьдрал үнэхээр хүнд байгаа. Төрөөс иргэдийнхээ амьдралыг өөд нь татах ажлыг нэгэнт хийж чадахгүй байгаа юм чинь "Хүний хөгжил сангийн тухай хуулийг" дахин сэргээж иргэдэд халамж үзүүлэх шаардлагатай болсон гэж МАН-ын бүлэг үзэж байгаа юм байна.  УИХ дахь МАН-ын бүлгийн дэд дарга Д.Оюунхорол "Монгол Улсын зээлжих зэрэглэл буурсан нь цаад агуулгаараа хувийн хэвшлийнхэн зээл авах боломжгүй болгож байгаа. Нөгөө талдаа эдийн засгийн нөхцөл байдал хүндэрсэн нь 40-өөс дээш насны орлогогүй иргэдэд маш эмзэг тусч байгаа тул өмнө нь иргэдэд сар тутамд олгож байсан 21 мянган төгрөгийг ажилгүй, орлогогүй, нийгмийн халамж зайлшгүй шаардлагатай хэсэгт хүргэх чиглэлээр УИХ бодлого гаргах ёстой болж байгаа" гэв.

Мөн Мөрдөх албаны тухай хуулийн төсөл болон Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүд /Хүнсний улирлын нөөц бүрдүүлэхэд шаардагдах 100.0 мянга хүртэл тонн улаан буудайг импортоор оруулахад, хэлэлцэх эсэх/ хэлэлцэхэд нухацтай хандах ёстой учраас яаран батлах шаардлагагүй гэж үзжээ. УИХ-ын гишүүн Б.Бат-Эрдэнэ энэ талаар "Монгол Улс "Атрын III-р" аяныг хоёр Засгийн газар дамжуулан хэрэгжүүлсний дүнд улаанбуудай гадаадаас импортоор авах бус экспортлох хэмжээнд очиж, амжилт олсон. Гэтэл нэг жилийн дотор хүрсэн төвшингөөсөө ухарсан нь Засгийн газрын үйл ажиллагаа тэр дундаа Үйлдвэр хөдөө аж ахуйн яам ажлаа хийж чадаагүйтэй холбоотой. Тухайлбал, Монгол Улс 2012 онд 452.5 мянган тонн улаанбуудай хураан авч байсан. Гэтэл ганцхан жилийн дотор буюу Шинэчлэлийн Засгийн газар ажилласан энэ хугацаанд улаанбуудайн ургац 369.8 мянган тонн болж өмнөх жилийнхээс  95.3 мянган тонноор буурсан нь үүний нотолгоо гэж үзэж байна. Мөн тариаланчдын хувьд улаанбуудайг 1 тонныг нь 400 мянган төгрөгөөр худалдан авах сонирхлыг илэрхийлсэн ч төр нь хүлээж авалгүй 320 мянган төгрөгөөр үнэлсэн. Үүнээс болж тариаланчид алдагдал нэлээд хүлээсэн тул өнгөрсөн хавар тариалалтаа багасан байх талтай. Тиймээс улаанбуудай импортоор авахад олон асуудлыг нягтлах шаардлага байна. Мөн "Үнэ тогтворжуулах дэд хөтөлбөр"-ийн хүрээнд гурил үйлдвэрлэгч 20 гаруй аж ахуйн нэгжид 48.7 тэрбум төгрөгийн хөнгөлөлттэй зээлийг олгосон. Энэ бүхэн үр дүн дагуулсан уу гэдгийг нягтлах шаардлагатай" гэв.