Ардчилагчдын хөшөө дурсгалыг устгах их авын аян дахин үргэлжилж байна. Өмнө Ленины хөшөөг нурааж Их зохиолч Д.Нацагдоржийн хөшөөг шилжүүлсэн юм. Бас Сүхбаатарын талбайн нэрийг Чингэсийн талбай болгож өөрчилсөн ч хүмүүс Сүхбаатарын талбай гэж ярисаар ирэв. Мөн Хэнтий аймгийн төвийг Чингэс хот хэмээн нэрлэх болсоноос гадна Эрдэнэт хот дахь Ерөнхий сайд асан А.Амарын хөшөөг нүүлгэн шилжүүлсэн гээд яривал олон зүйл бий. 

    Тэгвэл хамгийн сүүлд буюу өнгөрсөн тав дахь өдөр ард түмнийг шинэ жилийн баяраа тэмдэглэж байхад НИТХ сэмхэн хуралдаж Тусгаар тогтнолын хөшөөг буулгах шийдвэр гаргажээ. Харин Тусгаар тогтнолын хөшөөний суурин дээр VIII Богд Жавзандамба хутагтын хөшөөг босгохоор шийдвэрлэжээ.

    Уг нь Тусгаар тогтнолын хөшөөг улс орныхоо тусгаар тогтнолын төлөө амиа өргөсөн хүмүүст зориулан Монгол нутагт төрт улс үүсэн байгуулагдсаны 2220, Их Монгол Улсын 805, Үндэсний эрх чөлөөний хувьсгалын 100, Ардын хувьсгалын 90 жилийн ойг тохиолдуулан 2011 онд босгосон. Есөн хөлт цагаан туг, дөрвөн зүг, найман зовхис, хана хэрэм, бат бөх байдал, босоо сумны зэвийг дүрсэлсэн уг хөшөөг нээж тухайн үеийн Ерөнхий сайд С.Батболд “Монгол улсын тусгаар тогтнол, бүрэн эрхт байдал, бичиг соёл, гүн ухаан, хүсэл тэмүүллийн гайхамшгийг чимэг болгон харуулсан энэ сүрлэг хөшөө өргөн утга агуулгатай “гэрэлт цамхаг”, ирээдүй хойч үедээ өвлүүлэн үлдээх “үнэт дурсгал”, үүрд мөнхөд оршихуйн ”билэгдэл” мөн” хэмээн хэлж байжээ. Харамсалтай нь тусгаар тогтнолын төлөө амиа өгсөн хүмүүсийг сануулан үүрд мөнх орших учиртай хөшөө ердөө л хоёрхон жилийн настай байжээ.

    Уг хөшөөг нураах шийдвэрийг гаргаж байхад НИТХ дахь МАН-ынхан ямар байр суурь баримталсан юу гэж хэлсэн нь тодорхойгүй аж. Зарим эх сурвалжийн мэдээлснээр бол бараг зөвшөөрсөн сурагтай. Тусгаар тогтнолын хөшөөг нураахтай зэрэгцэн Тусгаар тогтнолын талбай хэмээх нэрийг ч өөрчлөх гэнэ. Уг нь энэ талбайн нэрийг өөрчлөх ёстой гэж О.Магнай тэргүүтэй тэмцэгчид сонгуульд ялсныхаа дараа мэдэгдэж байсан. Тэр мэдэгдэл удахгүй биелэлээ олж Тусгаар тогтнолын талбайг “Ялалтын талбай” эсвэл “Ардчилалын талбай” хэмээн нэрлэх гэнэ.

    Нийслэлийн Чингэлтэй дүүрэг дэх энэ талбайг Тусгаар тогтнолын талбай хэмээн нэрлэх үндэслэл тухайн үед байжээ. Учир нь 1911 оны тэмцэлийн хөдөлгөөн энэ талбайгаас эхэлж байсан бол 1921 оны Ардын хувьсгалын нийслэл дахь анхны том бослого мөн л энэ талбайд эхэлсэн байна. Мөн 1990 оны ардчиллын томоохон цуглаанууд ч Тусгаар тогтнолын талбайд явагдаж байж. Ямар ч гэсэн Монголын хувь заяатай холбоотой ийм талбайд Төвд хүн болох VIII Богд гэгээн Жавзундамба хутагтын хөшөөг босгох нь зохимжгүй гэж үзэх хүмүүс ч байна.
 
    Уг нь VIII Богд гэгээн Жавзундамба хутагт бол Монголын тусгаар тогтнолын төлөө зүйрлэшгүй гавьяа байгуулсан. Энэ гавьяа он цаг өнгөрөх тусам тодорч байгаа нь үнэн. Гэхдээ түүний хөшөөг Богдын музейнх нь хашаанд босговол илүү утга агуулгатай, учир жанцантай гэж үзэх түүхчид ч гарч ирлээ.

    Ямар ч байсан Тусгаар тогтнолын хөшөөг нурааж оронд нь Богдын хөшөөний шавыг тавих ёслолын ажиллагаа энэ сарын 29 өдөр тохиох Эрх чөлөөний өдрөөр болох гэнэ. Ийнхүү Монгол Улс тусгаар тогтнолын хөшөөгүй болох аж. Бас Тусгаар тогтнолын талбайн нэр ч засварлагдах гэнэ. Өөрөөр хэлбэл ардчилагчид тусгаар тогтнол гэсэн үг орсон бүхнийг устгахаар хичээж байна. Энэ нь юунд хүрэхийг, ямар зорилго агуулгатай хэлэхэд эрт байна.

    Ардчилагчдын дараагийн нүүлгэх хөшөө нь УИХ дэлгүүрийн өмнө байх Хичээнгүй сайд Б.Цэрэндоржийн хөшөө гэж эх сурвалж мэдээлэв. Учир нь түүнийг Монгол угсааны биш гэх элдэв яриа гарах болсон нь ийм учиртай бололтой. Мэдээж түүний оронд өөр нэгэн хүний хөшөө удахгүй заларч мэдэх юм. Ийнхүү хөшөө дурсгалын их авын аян үргэлжилж байна.