УИХ-ын гишүүн С.Бямбацогт Төрийн ордон дахь өрөөнийхөө үүдэнд гацуур мод засч, түүнийгээ сонирхолтойгоор чимэглэжээ. МАН-ын бүлгийн зүгээс эдийн засаг хүндэрч, иргэдийн амьдрал доройтож байгаа учир салбарын хоёр сайд нь хариуцлага хүлээх ёстой хэмээн Эдийн засгийн хөгжлийн сайд Н.Батбаяр, Сангийн сайд Н.Улаан нарыг огцруулах тогтоолын төслийг өргөн барьж өнөөдөр чуулганаар хэлэлцүүлж байна. Энэ асуудлаар МАН-ын залуу гишүүд Төрийн ордоны гадаа жагсаж байгаа бол Төрийн ордон дотор ч нэлээд бужигнаан үүсээд байгаа юм. Цөөнхийн бүлгийн хувьд хоёр сайдыг огцруулахаар тууштай үзэж байгаа. Үүнийгээ ч зарим зүйлээр илтгэн харуулж байгаа аж.

   Тодруулбал, УИХ дахь МАН-ын бүлгийн даргын үүдэнд зассан гацуур модонд өргөн хэрэглээний барааны үнийг энэ оны долдугаар сарын  болон өнгөрөгч арваннэгдүгээр сарын үнэтэй харьцуулсаныг хадсан зургаар  чимэглэжээ.

Уг цаасан чимэглэлд өнгөрсөн нэг жил гаруйн хугацаанд гурилын үнэ 20 хувиар, "Атар" талх 27 хувиар, цагаан будаа 30 хувиар, сүү 27 хувиар, тараг 25 хувиар, өндөг 70 хувиар, орон сууцны нэг метр кв-ийн үнэ 100 хувиар өссөн тухай бичсэн байна.

МАН-ын бүлгийн дарга С.Бямбацогт "Эдгээр тоо баримт бол эрх баригчдын ард түмэндээ барьж байгаа энэ оны “бэлэг” юм" хэмээн тайлбарлаж байна.