УИХ-ын чуулганы нэгдсэн хуралдаанаар Эдийн засгийн хөгжлийн сайд Н.Батбаяр, Сангийн сайд Ч.Улаан нарыг огцруулахтай холбоотой асуудлыг хэлэлцэж байна. Дээрх асуудалтай холбогдуулж асуулт, хариулт үргэлжилж байна.

Энэ талаар УИХ-ын гишүүн Ө.Энхтүвшин "Эдийн засаг энэ байдлаараа хол явахгүй. "Чингис", "Самурай" бондыг босгож Монголын ард түмнийг өрөнд дарагдуулж байна. Эрх баригчид энэ өрийг дараа нь яаж төлөх вэ гэж бодохгүй байна. 2016 онд галав юүлсэн ч яахав гэсэн байдалтай байна. Та нар бол 2016 онд улс төрд гарахгүй. Харин энэ өр ард иргэдийн нуруун дээр ирнэ. Одоо энэ өрийг төлөхийн тулд бизнес эрхлэгчдийг өдөр шөнөгүй дарамталж байна. Энэ талаар Тусгаар тогтнолын ордонд цугласан 500 гаруй бизнесмэн хэлсэн шүү. Бизнес эрхлэгчдэд өндөр торгууль тавьж, өдөр шөнөгүй дарамталж байж хэдэн төгрөг салгаж байна. Улсын байцаагч нарын ажлыг бизнес эрхлэгчдийг хэр их торгосноор нь дүгнэдэг болсон байна. Энэ мэтчилэн хүндрэлтэй асуудал их байна. Ард түмний амьдрал хүнд байна. Гэтэл Ерөнхий сайд нь "Цагаан будааны үнэ өсөөд байгаа бол гурил идчихгүй юу" гэж хэлж сууна. Ингэж ярьж болохгүй. Одоо 100 мянган тонн үр тариа гаднаас авах талаар ярьж байна. Нөгөө Атрын гуравдугаар аяны үрдүн байхгүй болчихлоо .Гаднаас үр тариагаа авч байна. Гурилын үнэ болон бусад бараа бүтээгдэхүүний үнэ өсөөн. Долларын ханш ингэж өссөн байхад хангалттай үндэслэл биш гэж сайд нараа өмөөрч байна. Үүнээс өөр үндэслэл гэж  юу байх вэ" гэж хэлэв.