МАН-ын дэргэдэх Зөвлөхүүдийн танхимын нээлт өнөөдөр Тусгаар тогтнолын ордонд боллоо. Зөвлөхүүдийн танхим нь МАН-ын  бодлого, үйл ажиллагааны уламжлалыг хангах үүднээс намын даргын дэргэд байгуулагдаж байгаа аж.  Уг танхимыг нээж тус намын дарга М.Энхболд үг хэлэв.

Зөвлөхүүдийн танхимын  бүрэлдэхүүнд МАН-ын үе үеийн дарга, Ерөнхий нарийн бичгийн дарга нар болон Ерөнхийлөгч, УИХ-ын дарга, Ерөнхий сайдаар ажиллаж байсан хүмүүс ажиллах аж. Өнөөдрийн байдлаар  МАН-ын дарга асан Г.Очирбат, Б.Даш-Ёндон, Н.Багабанди, С.Баяр, Сү.Батболд, Ө.Энхтүвшин, Ерөнхий нарийн бичгийн дарга асан Д.Идэвхтэн, Ё.Отгонбаяр, У.Хүрэлсүх, Г.Занданшатар, УИХ-ын дарга асан С.Төмөр-Очир, Ц.Нямдорж, Д.Лүндээжанцан, Д.Дэмбэрэл, Д.Содном, Ш.Гунгаадорж нар зөвлөхүүдийн танхимын бүрэлдэхүүнд орж байна. 

Зөвлөхүүдийн танхим нь намын дарга, Удирдах зөвлөл, УИХ дахь намын бүлэгт зөвлөх эрхтэй нэгж бөгөөд МАН-ын хэлснээр тус танхимын гишүүд нь МАН-ынханы “хар хайрцаг”, ой санамж аж. Танхимын үйл ажиллагааг цаашид зөвхөн нийслэлд төдийгүй орон нутагт ч хүрч ажиллуулахаар болсон гэдгийг МАН-ын удирдлагууд хэлж байна.  Зөвлөхүүдийн танхимын нарийн бичгийн даргаар Хүнс хөдөө аж ахуйн дэд сайдаар ажиллаж байсан Ж.Сауле  ажиллах юм байна.