УИХ-ын Байгаль орчин, хүнс, хөдөө аж ахуйн байнгын хорооны өнөөдрийн /2013.12.25/ хуралдаанаар эхлээд Байнгын хорооны даргыг сонгох асуудлыг хэлэлцэж тус Байнгын хорооны дарга Г.Баярсайханыг улираан сонгохыг хуралдаанд оролцсон гишүүд санал нэгтэй дэмжив.

Үүний дараа Ус болон Уур амьсгалын өөрчлөлтийн үндэсний хөтөлбөр, Байгаль, орчин ногоон хөгжлийн яамны 2013 оны жилийн төсөв, үндсэн чиглэл, үйл ажиллагааны хөтөлбөрийн хэрэгжилтийн тайланг сонслоо.

Мөн хуралдаанаар Ойн цэвэрлэгээний талаар авах зарим арга хэмжээний тухай Байнгын хорооны тогтоолын төслийг хэлэлцэв.

Сүүлийн жилүүдэд ойд хийх арчилгааны хэмжээ багасаж, жилд дунджаар 500 га талбайгаас хэтрэхгүй байгаа аж. Харин ойн цэвэрлэгээг жилд дунджаар 4000-5000 га талбайд явуулж, гарсан модыг тухайн орон нутгийн иргэдийн түлш, ахуйн хэрэглээний модны хэрэгцээг хангахад ашиглаж байгаа гэлээ. Ойд цэвэрлэгээний ажил явуулснаар ойг түймэр, хөнөөлт шавжийн аюул, хөнөөлөөс хамгаалах, ойг байгалийн аясаар нөхөн ургах боломжийг бүрдүүлэхээс гадна нийгэм, эдийн засагт өндөр ач холбогдолтой юм байна. Ойн нөөц бүхий аймаг, сумуудад хийгдсэн ойн цэвэрлэгээнээс гарсан түүхий эдийг эхний ээлжинд Улаанбаатар хот, ойгүй аймгуудын түлээний хэрэгцээг хангахад чиглүүлэхийн зэрэгцээ, хоёр дахь ээлжинд ой багатай болон томоохон хот суурингийн түлээний хэрэгцээ, шахмал түлш, шахмал хавтангийн үйлдвэрийн түүхий эдийн тодорхой хувийг хангахад, гурав дахь ээлжинд шинээр байгуулагдах модны үртэс хуванцарын холимогоор хийдэг барилгын орчин үеийн материал, хаягдал модноос дизель түлш, цэвэр ус, бионүүрс /бордоо/ гарган авах, үйлдвэрлэлийн болон бага оврын эрчим хүчний үйлдвэрийн түүхий эдийн зориулалтаар ашиглахад чиглүүлнэ гэв.

Хэлэлцүүлгийн явцад гишүүдээс гарсан саналыг тогтоолын төсөлд нэмж тусган дахин боловсруулж оруулж ирэх нь зүйтэй гэж үзлээ.

Хуралдааны дөрөв дэх асуудал “Малчид, үндэсний үйлдвэрлэгчдийг дэмжих зарим арга хэмжээний тухай” тогтоолын хэрэгжилтийг эрчимжүүлэх зарим арга хэмжээний тухай тус байнгын хорооны тогтоолын төслийг хэлэлцэх асуудал байлаа.

Тогтоолын төсөлтэй холбогдуулан гишүүд асуулт асууж, санал хэлсэн. Тухайлбал, УИХ-ын гишүүн Ц.Оюунгэрэл, хөнгөлөлттэй зээл олгоод дуртай газраа дуртай үйлдвэрлэлээ барьж болно гэх юм бол усны нөөцөнд аюултай хог хаягдал, ялангуяа үйлдвэрлэлийн шингэн хог хаягдал эрс нэмэгдэх эрсдэлтэй зүйлийг дэмжих гээд байгаа юм. Иймээс “ Арьс ширийг дотооддоо гүн боловсруулах болон түүгээр бэлэн бүтээгдэхүүн үйлдвэрлэх, үйлдвэрлэлдээ усыг дахин ашиглах, саарал усыг цэвэрлэх систем” гэсэн үг нэмж оруулаад эдгээрийг суурилуулахад үндэснийхээ үйлдвэрлэгчдэд хөнгөлөлттэй зээл олгох бололцоог хангамаар байна. Харин зөвхөн үйлдвэрлэлд нь зориулаад хөнгөлөлттэй зээл нь явчихаар цэвэр технологи оруулж ирэхэд зээл олдохгүй болох эрсдэлтэй гэлээ.

Мөн УИХ-ын гишүүн С.Дэмбэрэл, Ц.Оюунгэрэл гишүүний хэлсэнтэй санал нэг байгаагаа илэрхийлээд, Монголбанк оролцож байж бодитой ажил болно гэдгийг хэлсэн юм.

Хуралдаанаар тогтоолын төслийг гишүүдийн олонхи дэмжиж гарсан саналуудыг тогтоолын төсөлд нэмж тусгахаар болов гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.