МАН өнгөрсөн онд хийсэн ажлаа тайлагналаа.

 Намын Ерөнхий нарийн Ж.Мөнхбат өнгөрсөн онд болсон үйл явдлаас гурвын нь илүү онцолов. 

1. Ерөнхийлөгчийн сонгууль. Өнгөрсөн Ерөнхийлөгчийн сонгуульд МАН-аас Б.Бат-Эрдэнэ гишүүн оролцсон бөгөөд тэрбээр нийт сонгогчдын 43 хувийн саналыг авсан билээ. Хэдийгээр ялагдсан ч хүч тэнцвэргүй сонгуульд оролцож нийт иргэдийн тал хувийн саналыг авсан нь амжилт байсан. Тус сонгуулийн үр дүнг харвал МАН-д итгэх ард түмний итгэл нэмэгдсэн нь мэдрэгдсэн хэмээн МАН-ын Ерөнхий нарийн бичгийн дарга Ж.Мөнхбат хэллээ.

2. МАН-ын 27-р Их хурал. Уг хурал нь "Шинэчлэлийн" хэмээх тодотголтой болсоноороо онцлогтой байсан хэмээн тус намынхан ярьж байна. 27-р Их хурлаараа МАН алдаа, оноогоо дэнсэлж, намын дүрэм, мөрийн хөтөлбөр, бүтцийн шинэчлэлтийг хийж чадсан хэмээн дүгнэж байгаа аж. Мөн МАН боловсон хүчнээ бүрэн шинэчилж8 хамгийн их залуу боловсон хүчинтэй нам болж чадсан гэнэ. Тус намын удирдлагын багт ажиллаж буй хүмүүсийн 70 хувийг залуус эзэлж байгаа аж. Энэ үйл ажиллагаа МАН-ын бүлэгт ч явагдаж УИХ-ын гишүүн С.Бямбацогт бүлгийн даргаар сонгогдсон нь тус нам нь дотоод ардчилалтай, шудрага өрсөлдөөнтэйг илтгэж байна хэмээн намын Ерөнхий нарийн бичгийн дарга хэлэв.

3.Намуудын "Үндэсний зөвшилцөл" уулзал. МАН 27-р Их хурлаасаа хойш “Үндэсний зөвшилцөл”-ийг санаачилан хэрэгжүүлсэн. Цаашид үндсэн хуулийн өөрчлөлт, улс төрийн тогтвортой байдлыг хангах үүднээс үндэсний зөвшилцлийг үргэлжлүүлэх юм байна. Ингэснээр намуудын төлөвшилд ч сайнаар нөлөөлж, улс төрийн соёлыг эхлүүлсэн гэж дүгнэж байгаа аж. Мөн өнгөрсөн оноос МАН жирийн иргэдтэйгээ илүү ойр байж уулздаг болсон гэлээ. Тухайлбал тус нам иргэдтэйгээ уулзах нэг сарын аяныг саяхан зохион байгуулсан. Цаашид ч МАН-д ирэх шүүмжлэлийг эрүүлээр хүлээж авч ажилдаа тусгана гэв.

Тус нам ирэх 2014 оныг ард түмэн, иргэд, сонгогчиддоо хүрч ажиллах жил болгохоор ажиллаж байгаа аж. Асуудлыг албан тасалгааны цонхоор харах бус ард түмнийхээ дунд байж шийддэг болно. Мөн хариуцлагтай төр болгохын тулд хичээн ажиллаж, сөрөг хүчний үйл ажиллагааг сэргээсэн бусад намуудад үлгэр дууриалал, жишиг үзүүлэхийн тулд ажиллана хэмээн тус намын Ерөнхий нарийн бичгийн дарга Ж.Мөнхбат хэллээ.