УИХ-ын чуулганы өнөөдрийн үдээс өмнөх нэгдсэн хуралдаанаар Цагдаагийн албаны тухай хуулийг дагаж мөрдөх журмын тухай хууль болон холбогдох бусад хуулийн төслүүдийн хэлэлцэх эсэх асуудлыг хэлэлцлээ. Энэ тухай төсөл санаачлагчийн илтгэлийг Хууль зүйн сайд Х.Тэмүүжин, Хууль зүйн байнгын хорооны санал, дүгнэлтийг гишүүн Ц.Оюунбаатар нар танилцуулав.Хуулийн төслүүдийн хэлэлцэх эсэх тухай асуудлыг Хууль зүйн байнгын хороо энэ сарын 18-ны өдрийн хуралдаанаараа хэлэлцээд төслүүдийг хэлэлцэхийг дэмжсэн юм. Цагдаагийн албаны тухай хуулийг дагаж мөрдөх журмын тухай хуулийн төсөл болон холбогдох бусад хуулийг 2014 оны 1 дүгээр сарын 1-ний өдрөөс эхлэн дагаж мөрдөхтэй холбогдуулан Цагдаагийн албаны тухай хуулийг дагаж мөрдөх журмын тухай хуулийн төсөл болон холбогдох бусад хуулийн төслүүдийг боловсруулан батлуулж, түр хугацаанд зарим харилцааг зохицуулах зайлшгүй шаардлагатай байгаа аж. Иймээс уг хуулийн төсөлд Цагдаагийн албаны тухай хуулийн 21 дүгээр зүйлд заасан аймаг, нийслэлийн Иргэний зөвлөл 5-7 гишүүнийг анх томилохдоо 5 гишүүнтэй байх бол 1 гишүүн нь нэг жил, 2 гишүүн нь хоёр жил, 2 гишүүн нь гурван жил, 7 гишүүнтэй байхаар бол 1 гишүүн нь нэг жил, 3 гишүүн нь хоёр жил, 3 гишүүн нь гурван жилийн хугацаатай байхаар томилохоор тусгажээ. Мөн Цагдаагийн албаны тухай хуульд заасан цагдаагийн байгууллагад дотоодын цэргийн бие бүрэлдэхүүн, хугацаат цэргийн алба хаах үйл ажиллагаатай холбоотой төсөв санхүү, дэд бүтэц, барилга байгууламж, материал техникийн хангамж, зэвсэг хэрэгслийг шилжүүлэх, Цагдаагийн байгууллагын ажилтныг төрийн захиргааны албан хаагчийн орон тоо, цалингийн сүлжээ, шатлал, зэрэглэлд шилжүүлэх ажлыг 2014 оны 4 дүгээр сарын 1-ний өдрийг хүртэл хугацаанд үе шаттайгаар хэрэгжүүлэхээр тусгасан байна.
Түүнчлэн Цагдаагийн албаны тухай хуулийг дагаж мөрдөхөөс өмнө цагдаагийн алба хаагчийн урьд ажилласан хугацааг тооцоход түр саатуулах, баривчлах, эрүүлжүүлэх байранд эмч, жижүүрээр болон улсын онц чухал объектын харуул, жижүүр, замын цагдаагийн шугам замын байцаагч, зохицуулагч-цагдаагаар ажилласан 1 жилийг 1 жил 2 сараар тооцох, Цагдаагийн байгууллагын тухай хуулиар олгосон цолны тэмдгийг 2014 оны 1 дүгээр сарын 1-ний өдрөөс эхлэн зөвхөн цагдаагийн алба хаагчийн ёслолын хувцсанд зүүж хэрэглэх, Цагдаагийн байгууллага, алба хаагчаас албан үүргээ гүйцэтгэхдээ биеийн хүч, тусгай хэрэгсэл, галт зэвсэг хэрэглэх үндэслэл, журам, түр хугацаанд үйлчлэх зааврыг Улсын ерөнхий прокурортой зөвшилцөн хууль зүйн асуудал эрхэлсэн Засгийн газрын гишүүн баталж, үе шаттайгаар хэрэгжүүлэх, аймгийн төвөөс бусад суманд тасралтгүй ажиллаж байгаа цагдаагийн алба хаагчийн 30 сарын үндсэн цалинтай тэнцэх хэмжээний мөнгөн урамшлыг 2014 оны 1 сарын 1-ний өдрөөс эхлэн тоолж, таван жил тутам олгох зэрэг зохицуулалт хийхээр тусгажээ.
Төсөл санаачлагчийн илтгэл, Байнгын хорооны санал, дүгнэлттэй холбогдуулан гишүүд асуулт асууж, саналаа хэлсний дараа хуулиудын төслийг хэлэлцэх нь зүйтэй гэсэн байнгын хорооны саналын томъёоллоор санал хураалгахад нэгдсэн хуралдаанд оролцсон 52 гишүүний 39 нь буюу 75 хувь нь дэмжсэн тул хуулийн төслүүдийг анхны хэлэлцүүлэгт бэлтгүүлэхээр Хууль зүйн байнгын хороонд шилжүүллээ.
Дараа нь Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулиудын төслийн хэлэлцэх эсэх асуудлыг хэлэлцэв. Энэ тухай хууль санаачлагчийн илтгэлийг Үйлдвэр, хөдөө аж ахуйн сайд Х.Баттулга, Төсвийн байнгын хорооны санал, дүгнэлтийг гишүүн Ж.Эрдэнэбат нар танилцуулав.
Засгийн газраас санаачлан боловсруулж өргөн мэдүүлсэн эдгээр хуулийн төсөлд хүн амын хүнсний хангамж, хүртээмжийн тогтвортой байдлыг хангах арга хэмжээний хүрээнд стратегийн хүнсний улирлын нөөц бүрдүүлэхэд шаардагдах 100 мянга хүртэл тонн улаанбуудайг импортоор оруулахад Гаалийн болон Нэмэгдсэн өртгийн албан татвараас чөлөөлөхөөр, хуулийг батлагдсан өдрөөс эхлэн 2014 оны 6 дугаар сарын 1-ний өдрийг хүртэлх хугацаанд дагаж мөрдөхөөр тусгасан байна.
Төсөл санаачлагчийн илтгэл, Байнгын хорооны санал, дүгнэлттэй холбогдуулан Д.Дэмбэрэл, Ж.Энхбаяр, С.Баярцогт, Ш.Түвдэндорж, Ж.Эрдэнэбат, Н.Батцэрэг, Ё.Отгонбаяр нарын гишүүд Үйлдвэр, хөдөө аж ахуйн сайд болон ажлын хэсгээс асуулт асууж хариулт авав. Тухайлахад гишүүн Ж.Эрдэнэбат хөнгөлөлтийн хувьд гурил, улаанбуудайд ялгаа байхгүй болохоор бэлэн гурил оруулж ирж болохгүй юу гэдгийг тодруулахад сайд Х.Баттулга одоогоор манайд гурилын 70 гаруй үйлдвэр байгаа. Иймээс гурилын үйлдвэрүүдээ ажилтай байлгах үүднээс бэлэн гурил биш улаанбуудай оруулж ирэх хэрэгтэй гэж үзэж байгаа гэсэн хариулт өгөв. Харин гишүүн Н.Батцэрэг одооогоор гурилын нөөц хэр байгаа, цаашдаа тариалангийн чиглэлээр ямар бодлого барихаар төлөвлөж буйг тодруулахад Үйлдвэр, хөдөө аж ахуйн сайд “Газар нутаг уудамтай манай улсын тухайд баруун бүс дэд бүтэц муу, өртөг зардал өндөр тул тэнд импортын гурил хямд байгаа. Иймээс дэд бүтэц муутай бүсэд дэд бүтэц бий болгоход төвийн бүсээс илүүтэй дэмжлэг үзүүлэх бодлого барьж байгаа. Цаашдаа зүүн аймгуудад газар тариалан эрхлэх боломж нэмэгдэнэ. Энэ бүхэнд чиглэсэн бодлогын баримт бичиг гаргаж байгаа” гэлээ. Мөн баруун бүсэд газар тариалан эрхэлж гурилын үйлдвэрт тушаасан улаанбуудайд бусад бүсээс 50 хувиар илүү урамшуулал олгохоор шийдвэрлэсэн гэдгийг хэллээ. Түүнчлэн гишүүн Ё.Отгонбаярын асуултад тус яамны Төрийн нарийн бичгийн дарга Х.Золжаргал борлуулалт, худалдан авалтыг зохицуулах үүднээс улаанбуудай худалдаж авах үнэд зохих өөрчлөлт оруулсан нь үр дүнгээ өгсөн гэж үзэж байгаа. Ер нь гурил үйлдвэрлэгчдээ дэмжих нь тариаланчдаа дэмжиж байгаа хэрэг. Нөөцийн хувьд урьд жилүүдтэй харьцуулахад хангалттай биш байгаа. Өнгөрсөн онд импорттойгоо нийлээд 349 мянган тоннын нөөцтэй байсан бол одоогийн нөөц 265 мянган тонн буюу хэрэгцээгээ харахад 100 мянган тонн хэрэгтэй байгаа гэсэн хариулт өгөв.
Ингээд хуулийн төсөлтэй холбогдуулан гишүүд асуулт асууж дууссан тул нэгдсэн хуралдаан завсарлаж, үдээс хойшхи хуралдаан дээр гишүүд уг хуулиудын төслийг хэлэлцэх эсэхтэй холбогдуулж үгээ хэлэхээр болов гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.
