УИХ дахь МАН-ын бүлгийн даргаар томилогдсон С.Бямбацогт эрх баригчдыг сандаргасан элдэв сюрпризийг дэлгэх боллоо. Саяхан тэрээр үнийн өсөлтийг харуулсан сүлд модыг өрөөнийхөө үүдэнд засч ихээхэн дуулиан дэгдээсэн.

Тэгвэл тэрээр өнөөдрөөс эхлэн эрх баригчдад нэгэн өвөрмөц мэндчилгээг илгээж эхэлжээ. Түүний мэндчилгээ эрх баригчдын бухимдлыг төрүүлж байгаа бол зарим нэгний инээдийг хүргэж байгаа аж. Бас эрх баригчдын туслахууд С.Бямбацогтын мэндчилгээг эрж сурах болсон байна. Уг мэндчилгээнд улсынхаа нэрийг барьж өр нэмэхгүй байх, өсгөсөн валют, үнэ ханшаа бууруулах, төсвийн орлогыг дахин тасалдуулахгүй байх, төрийн албыг төрлийн алба болгохоо зогсоохыг эрх баригчдад захиснаараа хэвшмэл мэндчилгээний хэлбэрийг эвдсэн байна. Мөн ирэх онд ардынхаа цалин, ахмадынхаа тэтгэврийг нэмж, аж ахуйн нэгжээ алагчлалгүй дэмжиж, ажлын байрыг олноор нэмж, амласнаа заавал биелүүлэхийг сануулж, шинэчлэлийн бодлогоо жинхэнээр нь хэрэгжүүлж, шинэ жилээ сайхан тэмдэглэхийг хичээнгүйлэн хүсчээ. Үүний зэрэгцээ МАН-ын бүлгийнхэн зөвд ташуур, бурууд хазаар болж ажиллахаа ч илэрхийлсэн байна. Ингээд энэ жилийн хамгийн өвөрмөц содон мэндчилгээ гэж нэрлэгдээд байгаа С.Бямбацогтын мэндчилгээг бүрэн эхээр нь хүргэж байна.