УИХ-аар өнөөдөр байнгын хороодын дарга нарыг баталсан. Нийт найман байнгын хорооны дарга нараас АН-ын таван байнгын хорооны даргыг улираан сонгож, харин “Шударга ёс” эвслийн хоёр байнгын хорооны даргыг өөрчилсөн билээ. Тодруулбал, Төрийн байгуулалтын байнгын хорооны дарга А.Бакей, Эдийн засгийн байнгын хорооны дарга Б.Гарамгайбаатар, Өргөдлийн байнгын хорооны дарга Р.Бурмаа, Байгаль орчин, хүнс, хөдөө аж ахуйн байнгын хорооны дарга Г.Баярсайхан, Хууль зүйн байнгын хорооны дарга Ш.Түвдэндорж нарыг улираан сонгосон. Харин Аюулгүй байдал гадаад бодлогын байнгын хорооны даргаар Ц.Оюунбаатар, Нийгмийн бодлого, боловсрол, соёл, шинжлэх ухааны байнгын хорооны даргаар Д.Батцогт нарыг томиллоо.  Тэгвэл УИХ-ын Төсвийн байнгын хорооны дарга Ц.Даваасүрэнг тус хорооны даргаар үргэлжлүүлж албыг нь хашуулах уу, эсвэл авч хаях уу гэдэг одоо ч тодорхойгүй байна. Ц.Даваасүрэн нь бие даагчдын бүлгийнх бөгөөд АН "Төсвийн байнгын хороогоо Ардчилсан намын бүлэг авах ёстой” гэж үзэх болсноос энэ асуудал УИХ-аар хэлэлцэгдэж батлагдаагүй байна. Тиймээс уг асуудлыг хэлэлцэж шийдвэрлэсний дараа ирэх долоо хоногийн чуулганы хуралдаанаар асуудлыг хэлэлцэж магадгүй аж.