УИХ-ын чуулганы нэгдсэн хуралдаанаар Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцээд дахин байнгын хороогоор хэлэлцүүлэхээр боллоо. Уг хуулийн төслийг УИХ-ын гишүүн Д.Эрдэнбат, А.Бакей нар санаачилан УИХ-д өргөн мэдүүлсэн.

Тус хуулийн төсөл сүүлийн үед саарал ордонд дуулиан тариад байгаа бөгөөд гишүүдийн ирцийг бүрдүүлэхийн тулд хурууны хээгээр санал авах талаар будлиан үүсээд байгаа юм. Өмнөх долоо хоногт хурууны хээ унших төхөөрөмжөөс болж МАН-ын бүлэг завсарлага авсан. Тухайлбал ирцээ бүртгүүлэхдээ "Yes" гэж дарсан ч "No" гэж гарсан. Мөн 10 эмэгтэй гишүүн байхад уг төхөөрөмжинд 17 эмэгтэй гишүүн ирсэн гэсэн. Тиймээс ийм алдаатай, "но"-той төхөөрөмж ашиглаж болохгүй гэж МАН-ын гишүүд эрс эсэргүүцсэн юм. Мөн хурууны хээгээр ирц бүртгэнэ гэсэн хууль батлаагүй байж хэрэгжүүлж эхэлж байгаа нь буруу хэмээн шүүмжилсэн. Тиймээс төхөөрөмжийг холбогдох газраас нь шалгаж баталсаны дараа буюу өнөөдөр УИХ-ын чуулганаар хэлэлцсэн нь энэ юм.

Уг хуулийн төслийг хэлэлцэхтэй холбогдуулан зарим гишүүд саналаа хэллээ.

УИХ-ын гишүүн Ц.Нямдорж: УИХ-ын гишүүд хуралдаа ирж сууцгаах хэрэгтэй. Сууж чадахгүй бол өргөдлөө өгөөд больцгоо. АН, МАН-ын гишүүдийн аль нь ч ялгаагүй хуралдаа ирц суугаад ирцээ өг. Би бүх намын гишүүдэд хэлнэ. Та нарыг ямар долигнож амьдралтай нь биш. Хуралдаа ирж суудаггүй гишүүдтэй арай өөр хариуцлагын асуудлыг  ярьмаар байна.


ЦИХ-ын гишүүн Д.Эрдэнэбат:  Би Ц.Нямдорж гишүүний саналыг дэмжиж байна. Хуралд ирж суух, үгүй нь бидний ухамсарын асуудал. Гэхдээ бүх гишүүд ирдэггүй биш цөөн хэдэн л хурал тасалдаг. Манай 1-2 нөхөр байна. Танай 5-6 гишүүн байна. Ийм хэдэн нөхөд хуралдаа суухгүй байна. С.Бямбацогтоо битгий бухимд. Би асуудлыг улс төржүүлж болно. Гэхдээ энэ бол бидний бүгдийнх нь асуудал учраас санал бодлоо чөлөөтэй хэлээд явъя. Ер нь хуралд суудаг идэвхтэй хэдэн гишүүд л бие биенээ шүүмжлээд байгаа.

УИХ-ын гишүүн Ц.Баярсайхан: Бид чуулганы ирцээ бүрдүүлэх асуудлыг арай өөр нөхцөл байдалд ярьмаар байна. Ингэж хэвлэл мэдээлэл, олон нийтийн өмнө өөрсдийнхөө арчаагүй байдлын талаар ярьж болж байгаа юм уу. Гадны сувгуудаар гарч байгаа шүү дээ. Хуралдаа ирц суух нь бидний хариуцлага. энэ ажлыг арай өөр байдлаар зохион байгуулмаар байна. Хуучин УИХ-ын хурлын дарга шийддэг байсан. Ингэж болохгүй юм уу. Сонгогчидын өмнө өөрсдийнхөө идэвхгүй байдлыг дэлгэх нь зохимжгүй.Сонгогчдын итгэл найдвар нь алдарч байна. Хайран цаг. Та бүхэн улс орны нийгэм эдийн засагтай холбоотой амин чухал асуудлаар дуугардаггүй мөртлөө хэрэггүй зүйл дээр том, том дуугарах юм.