УИХ-ын чуулганы өнөөдрийн үдээс хойшх хуралдаанаар УИХ-ын гишүүн А.Бакей, Д.Эрдэнэбат, Н.Батцэрэг нарын санаачилсан Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийн хэлэлцэх эсэх асуудлыг хэлэлцлээ.

  Хууль санаачлагчийн илтгэлийг Улсын Их Хурлын гишүүн Д.Эрдэнэбат, Төрийн байгуулалтын байнгын хорооны санал, дүгнэлтийг Улсын Их Хурлын гишүүн Ж.Батзандан нар танилцуулав.

УИХ-ын чуулганы хуралдааны дэгийн тухай хуульд тухайн өдрийн хуралдаан эхлэхэд ирцэд бүртгүүлсэн гишүүн чөлөө аваагүй, хүндэтгэн үзэх болон эсэргүүцэх шалтгаантайгаа мэдэгдэлгүй хуралдааныг орхиж гарсан, эсхүл бүртгэлээс гарсан /картаа сугалсан/ бол түүнийг хуралдааны ирцэд тооцон тухайн асуудлаар санал хураахад эсрэг санал өгсөнд тооцдог.

Дээр дурдсанаас өөр шалтгаанаар хуралд суугаагүй гишүүдийн санал хэлэлцэж байгаа асуудлаар санал хураах мөчид татгалзсанаар тооцогддог учир хууль тогтоомжийг хэлэлцэж батлах үйл ажиллагаа ихээхэн учир дутагдалтай явагдаж, хууль тогтоомжийн чанарт ихээр нөлөөлөхөд хүрч байна гэж дээрх нэр бүхий гишүүд үзсэний үндсэн дээр УИХ-ын үйл ажиллагааг боловсронгуй болгож, гишүүний сонгогчдынхоо өмнө хүлээсэн үүргээ шударгаар биелүүлэх нөхцөлийг бүрдүүлэх үүднээс Монгол Улсын Их Хурлын чуулганы хуралдааны дэгийн тухай хуульд нэмэлт оруулж хуралдаанд ирц бүрдүүлэхэд биеийн давхцахгүй өгөгдөл /гарын хурууны хээ/-ний төхөөрөмж ашиглах эрх зүйн орчин бүрдүүлэх хуулийн төслийг санаачлан боловсруулсан байна.

Төсөл санаачлагчийн танилцуулгатай холбогдуулан Улсын Их Хурлын гишүүн Ж.Батсуурь, Ц.Даваасүрэн, З.Баянсэлэнгэ, Ж.Энхбаяр, Х.Болорчулуун, Ё.Отгонбаяр нар асуулт асууж, Д.Эрдэнэбат, А.Бакей нар хариулт өгч, Ц.Нямдорж, Ж.Батзандан, Ц.Баярсайхан, Д.Дэмбэрэл нар үг хэлэв.

Ингээд байнгын хорооны санлаар хуулийн төслийг хэлэлцэхийг дэмжье гэсэн саналын томъёоллоор санал хураалгахад хуралдаанд оролцсон гишүүдийн 74,1 хувь дэмжсэн тул хэлэлцэхээр болов.

Дараа нь Улсын Их Хурлын гишүүн С.Бямбацогт нарын өргөн мэдүүлсэн, Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслийн, Монгол Улсын Их Хурлын чуулганы хуралдааны дэгийн тухай хуулийн зарим заалтыг хэрэгжүүлэх арга хэмжээний тухай Улсын Их Хурлын тогтоолын төслийг хэлэлцэх эсэх асуудлыг хэлэлцлээ.

Хууль санаачлагчийн илтгэлийг Улсын Их Хурлын гишүүн С.Бямбацогт, Төрийн байгуулалтын байнгын хорооны санал, дүгнэлтийг Улсын Их Хурлын гишүүн М.Энхболд нар танилцуулав.

Төсөл санаачлагчийн танилцуулгатай холбогдуулан Улсын Их Хурлын гишүүн Ц.Даваасүрэн, Б.Бат-Эрдэнэ нар асуулт асууж, С.Бямбацогт хариулт өглөө.

Ц.Даваасүрэн өмнөх хэлэлцсэн төсөлтэй нэгтгэж хэлэцэхийг дэмжиж байна, дэгийн хуулиар нэмэлт, өөрчлөлт оруулах нь маш хязгаарлагдмал учир зөвхөн оруулсан санлын хүрээнд л хийхийг санууллаа.

Төслүүдийг хэлэлцэхийг дэмжье гэсэн саналын томъёоллоор санал хураалгахад хуралдаанд оролцсон гишүүдийн 67,9 хувь дэмжсэн тул байнгын хороонд шилжүүлэв.

Төрөөс эрдэс баялгийн салбарт баримтлах бодлого батлах тухай УИХ-ын тогтоолын төслийн эцсийн хэлэлцүүлгийг хийлээ.

УИХ-ын гишүүн С.Одонтуяаг танилцуулсны дараа гишүүн С.Бямбацогт, Ж.Батзандан , Г.Уянга нарын гишүүд асуулт асууж, хариулт авлаа.

Төрөөс эрдэс баялгийн салбарт баримтлах бодлогын баримт бичиг нь нийтлэг үндэслэл, эрдэс баялгийн салбарт баримтлах зарчим, эрдэс баялгийн салбарт баримтлах бодлогын чиглэл, эрдэс баялгийн бодлогыг хэрэгжүүлэх арга зам, хүрэх үр дүн гэсэн 4 үндсэн бүлгээс бүрдэнэ. Бодлогын баримт бичгийг боловсруулахдаа Мянганы хөгжлийн зорилтод суурилсан Үндэсний хөгжлийн цогц бодлого, Бүсчилсэн хөгжлийн үзэл баримтлал, Монгол Улсын Үндэсний аюулгүй байдлын үзэл баримтлал болон бусад холбогдох томоохон үндэсний хөтөлбөрт суурилж боловсруулжээ.

Монгол Улсын Их Хурлын гишүүн, УИХ дахь МҮАН-МАХН-ын "Шударга ёс" эвслийн бүлгийн дарга Н.Батцэрэг дараагийн хэлэлцэх бүх асуудлаар ажлын 5 хоног завсарлага авснаар өнөөдрийн чуулганы нэгдсэн хуралдаан өндөрлөлөө гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.