Төсвийн хөрөнгө оруулалтаар ирэх онд хэрэгжүүлэх төсөл, арга хэмжээний бэлтгэлийг оны эхний хоёр сард багтаан хангахыг Засгийн газрын хуралдаанаас яам, агентлагуудад үүрэг болголоо.

  Хөрөнгө оруулалтын төсөл, арга хэмжээний техник, эдийн засгийн үндэслэл, зураг төслийг 2014 оны 2 дугаар сарын 1-ний дотор эцэслэж бэлэн болгоно. Үүний тулд төлөвлөгөөнд багц дүнгээр туссан ажил тус бүрийг байршил, хүчин чадал, санхүүжих дүнгээр нь нарийвчилж 1 дүгээр сарын 5-ны дотор, орон нутаг, харъяа агентлаг руу эрх шилжүүлэх арга хэмжээний саналыг 1 дүгээр сарын 7-ны дотор тус тус гаргаж, Эдийн засгийн хөгжлийн яаманд хүргүүлэх үүргийг Төсвийн Ерөнхийлөн захирагчдад өглөө. Түүнчлэн, худалдан авах ажиллагааг оны эхнээс шуурхай зохион байгуулах, орон нутагт хэрэгжих төсөл, арга хэмжээний бэлтгэлийг 1 дүгээр сард багтаан хангахыг аймаг, нийслэлийн Засаг дарга нарт даалгалаа.

  Бэлтгэл нь хангагдсан төслүүдийн худалдан авах ажиллагааг шууд хэрэгжүүлэх, барилгын ажлыг 4 дүгээр сарын 1-нээс хоцроолгүй эхлүүлэхээр төлөвлөж байгаа юм.