Монголын хэвлэл мэдээллийн хэрэгсэлүүдийн ихэнхи нь энэ жилийн содон үйл явдлуудын тоонд Н.Энхбаярыг эрх чөлөөтэй болгосныг нэрлэв. Суллагдаад хэдхэн хоносны дараа БНСУ-ыг зорьсон Н.Энхбаяр одоо болтол эмчлүүлсээр байна. Тэрээр богино хугацаанд 4-5 жижиг хагалгаануудад амжилттай оролцсон аж. Бас эмнэлэгт хэвтэхийн зэрэгцээ Буддын шашины арга хэмжээнд оролцоод амжсан нь хэвлэл мэдээллийн хэрэгсэлүүдээр цацагдсан.

 Түүнийг харь газар биеэ эмчлүүлж, шашины үйл хэрэгтээ зүтгэж байх хооронд үүсгэн байгуулсан МАХН-д нь олон шинэ үйл явдлууд өрнөх болов. Зарим гишүүд нь Н.Энхбаярыг намын даргын ажлаа өгөхийг шаардах болсон. Бас зарим гишүүд нь бие биеэ намаасаа хөөж байгаагаа хэвлэл мэдээллийн хэрэгсэлээр ил тод зарлав. Өмнө нь сайд асан У.Барсболдыг ах дүүсийнх нь хамт МАХН-аас хөөсөн.

Тэгвэл одоо УИХ-ын гишүүн О.Баасанхүүг МАХН-аас гарахыг Д.Тэрбишдагва тэргүүтэй хүмүүс сануулж эхэллээ. Учир нь О.Баасанхүүг МАХН-ын дарга Н.Энхбаярыг албан тушаалаас нь огцрохыг шаардаад байгаа хэсэг гишүүдтэйгээ уулзсан, тэдний далд удирдагч нь гэж Д.Тэрбишдагва тэргүүтэй хүмүүс үзээд байгаа бололтой. Тиймээс л О.Баасанхүүг намаасаа гарах ёстой гэж Д.Тэрбишдагва үзсэн аж.

Харин МАХН-аас О.Баасанхүүг хөөж байгаа үйл явдлыг ажиглагчид өөрөөр тайлбарлаж эхлэв. Зарим ажиглагчдын үзэж байгаагаар бол Н.Энхбаярыг УИХ-ын гишүүн болгохын тулд О.Баасанхүүг эргүүлэн татах ажиллагааг хийж эхэлсэн нь энэ аж. Уг нь Н.Энхбаярыг МАХН-ын сонгуулийн үеийн листийн жагсаалтаас хассан. Тиймээс хуулиараа Н.Энхбаяр УИХ-ын гишүүн болох ямар ч боломжгүй гэсэн үг.

Улс төрийн энэ нөхцөл байдлыг сайн ойлгож байгаа Н.Энхбаяр саяхан БНСУ-аас намынхаа гишүүдтэй ярьсан аж. Тэрээр намынхаа гишүүдийг эв нэгдэлтэй байхыг үүрэгдсэнээс гадна “Санаа зоволтгүй, би УИХ-ын гишүүн болохгүй” гэж хэлсэн сураг байна. Өөрөөр хэлбэл “намайг УИХ-ын гишүүн болгох гэж улайрах хэрэггүй. Бас УИХ-ын гишүүний суудлаа алдана гэж зарим нь айх хэрэггүй” гэсэн утгаар ярьсан  бололтой.

Харин ингэж санаачилга гаргах, санаа зовохын оронд улс төрд баг болж ажиллах шинэ залуусыг судлахыг үүрэг болгосон гэнэ. Түүнээс гадна МАН-ын дотор үүссэн улс төрийн хагарлыг сайтар ашиглах үүргийг Д.Тэрбишдагва, Г.Шийлэгдамба тэргүүтэй хүмүүст өгсөн аж.

Тухайлбал МАН-аас нэр цэвэр, авлига хээл хахууль, газрын наймаанд оролцоогүй, тодорхой алба хашиж байсан, ирээдүйд өсөх магадлалтай залуусыг урвуулж намдаа оруулах талаар санаачилгатай ажиллахыг сануулсан гэж эх сурвалж мэдээлэв. Ойрноос МАХН-ын дарга БНСУ-аас үе үе намынхаа гишүүдтэйгээ “Н.Энхбаяр байна” хэмээн ярих болжээ. Бодвол түүний бие сайжирч, улс төрд идэвхитэй ажиллах цаг нь эргэн ирж байгаа бололтой.