Оны хамгийн отгон сүр дуулиантай наадам бол НАМЗХ-ноос зарладаг “Алтан сарнай” билээ. Өнгөрч буй жилийн “Алтан сарнай” урьдын адил олон түмний анхааралд байв. Харамсалтай нь өнгөрсөн жилийн Монголын шилдэг улс төрчөөр далай даян дархан аварга, УИХ-ын гишүүн Б.Бат-Эрдэнийг шалгаруулсан нь “юу болоод өнгөрөв өө” гэдэг шиг юм болов. Өөрөөр хэлбэл Ерөнхийлөгчийн сонгуульд ялсан нь биш ялагдсан нь оны шилдэг улс төрч боллоо! За яахав МАН-ынхан заавал өөрийн намынхандаа өгөх ёстой юм бол Ц.Элбэгдоржийг хасч болно л доо. МАН-ынхны шалгаруулалт, үнэлэмжээр сонгуульд ялагдаад шилдэг улс төрч болдог юм бол Монголын бүх сонгуульд ялагдсан хүмүүс шилдэг улс төрч юм байна л даа.

    Уг нь дэлхийн жишигээр бол сонгуульд ялагдсан нь хариуцлагаа хүлээдэг. Харин ялсан нь шилдэг болдог. Хамгийн сүүлийн жишээгээр бол АНУ-ын Ерөнхийлөгчийн сонгуульд ялсан Б.Обамаг дэлхийн хэвлэлүүд энэ оны улс төрчөөр нэрлэж байна. Бас сонгуульд ялж Kанцлераар улиран сонгогдсон А.Маркель Германы шилдэг улс төрч болж байх жишээтэй. Гэтэл сонгуульд ялагдсан Б.Бат-Эрдэнийг Монголын шилдэг улс төрчөөр нэрлэж байна! Уг нь Б.Бат-Эрдэнэ намынхнаасаа уучлал гуйгаад хариуцлагаа үүрээд явж байх ёстой л доо. Гэтэл түүний сонгуулийг удирдаж байсан Ө.Энхтүвшин, Г.Занданшатар, Ж.Сүхбаатар тэргүүтэй хүмүүс Б.Бат-Эрдэнийн өмнөөс хариуцлага хүлээж албан тушаалаасаа огцорцгоосон. Харин аварга Б.Бат-Эрдэнэ хариуцлага ярихгүй шилдэг улс төрч болж дэвээд байдаг нь ямар учиртай вэ?

    Хамгийн хачирхалтай нь аварга Б.Бат-Эрдэнэ шилдэг улс төрчийнхээ “Алтан сарнай”-гаа гардаж авах торгон агшиндаа “Би улсын наадамд 10 гаруй удаа түрүүлсэн. Улс төрд ороод бараг 10 жил боллоо. Би бөхдөө хайртай” гэх мэтээр бөхөө ярьсаар бууж одсон. Уг нь шилдэг улс төрчийг ард түмнийхээ төлөө ажилласан улс төрчдөд өгөх ёстой болохоос аварга хүнд өгөх ёсгүй санагдах юм. Хэрэв шилдэг улс төрчийн “Алтан сарнай”-г бөх хүнд өгөх ёстой юм бол ирэх жил Х.Баянмөнх, Ж.Мөнхбат хоёрын нэг нь баараггүй авах байх!

    Мөн шилдэг улс төрчийн “Алтан сарнай”-г гардуулсан МАН-ын дарга М.Энхболдын тайзан дээрээс хэлсэн үг анхаарал татав. Тэрээр “Манай Б.Бат-Эрдэнэ аварга ерөнхийлөгчийн сонгуульд амжилттай өрсөлдөж 42 хувийн санал авсан. Өмнө манай намаас нэр дэвсэн хүмүүсийн амжилтыг ахиулсан” гэж хадуурсан юм. Ерөнхийлөгчийн сонгуульд МАН-аас нэр дэвшсэн Н.Багабанди, Н.Энхбаяр хоёр хоёулаа 50 гаруй хувийн саналаар ялалт байгуулж байсан. Гэтэл тэдний ялалтыг МАН-ын шинэ дарга яагаад үгүйсгэж ялагдсан хүнийхээ 42 хувийг “амжилтыг ахиулсан” гэж түмэн олонд зарлав гэдэг анхаарал татна. Бодвол Б.Бат-Эрдэнийг магтаж хэлэх үг олдохгүй бантахдаа л ингэж залсан байх л даа. Эсвэл энэ шалгаруулалтаас ичихдээ зориуд тэгж хэлсэн ч байж болно. 

    Харин Б.Бат-Эрдэнэ өнгөрч буй жилийн шилдэг улс төрч болсон явдлыг олон түмэн МАН-ынхан лидерийн хомсдолд орсны нэг илрэл хэмээн дүгнэж байна. Энэ намд туршлагатай тулхтайгаас гадна улс орны бодлогын ноён нуруу болдог олон шилдэг улс төрчид бий л дээ. Тэднийг дурдахаа больё гэхэд МАН-ын даргад нэр дэвшээд өөрөө сайн дураараа татгалзсан Ж.Энхбаяр, УИХ-дахь бүлгийн дарга болсон хэдхэн хоногтоо олон зүйлд өөрчлөлт хийж буй Ж.Бямбацогт, улс төрд эрчимтэй суралцаж байгаа Я.Содбаатар, Д.Сумьяабазар гээд шилдэг залуус олон арваараа тоологдоно. Энэ бүхнийг Б.Бат-Эрдэнэ ялж 2013 оны шилдэг улс төрч болсон нь Монголын улс төрд, МАН-д маш том асуултын тэмдэг тавилаа.