УИХ-ын гишүүн  О.Баасанхүү өнөөдөр болсон “Ерөнхий сайдын 30 минут” уулзалтад оролцож, Ерөнхий сайд Н.Алтанхуягаас зарим зүйлд тодруулга авлаа.

О.Баасанхүү гишүүн  Төрийн тусгай албан хаагчдын эмнэлэгийн асуудлаар Ерөнхий сайдад олон удаа хандаж, шаардлага хүргүүлсэн ч түүнд нэг ч удаа хариулт өгч байгаагүй аж. Ер нь түүний асуултад Ерөнхий сайд огт хариу өгдөггүй байна. Тиймээс О.Баасанхүү гишүүн өнөөдөр сэтгүүлчдийн нүдэн дээр Ерөнхий сайдаас хариулт авахаар уулзалтад оролцсон нь энэ юм байна.

Энэ үеэр сэтгүүлчид Ерөнхий сайдаас “Хоёр сайдыг огцруулахгүй гэж кноп дарвал төрийн тусгай албан хаагчдын эмнэлэгийг нааштайгаар шийдэж өгнө хэмээн та О.Баасанхүү гишүүнд амласан гэсэн. Энэ асуудлаар та хоёр тохиролцсон юм уу” хэмээн асуув.

Харин Ерөнхий сайд “О.Баасанхүү гишүүн бид хоёр тохироо хийгээгүй” гэж хариулснаас үүдэн Ерөнхий сайд Н.Алтанхуяг, О.Баасанхүү гишүүн хоёрын дунд маргаан өрнөсөн юм.

- О.Баасанхүү гишүүн: Та байшинг эмнэлэгийн зориулалтаар  ашиглахыг дэмжиж байна гэж хэлсэн шүү дээ. Зөвшөөрнө гэж хэлсэн. Үүнийгээ батлаад сэтгүүлчдийн нүдэн дээр хэл.

- Ерөнхий сайд:  Би судлая л гэсэн. Хотын төвд эмнэлэг байх нь машины зогсоолоос эхлээд зовлонтой зүйл их байгаа. Гэхдээ О.Баасанхүү гишүүн бид хоёр нэг зүйл дээр санал нэгдсэн. Хоёр эмнэлэгийг нэгтгэж Батлан хамгаалахын тэнд аваачих нь зөв зүйтэй гэсэн. Тийм биз дээ. Харин эмнэлэгийн оффис биш эмнэлэгийн зориулалтаар ашиглахын тулд судалгаа хэрэгтэй гэж би хэлсэн. Түүнээс биш тохироо хийгдээгүй.

 - О.Баасанхүү гишүүн: "Ерөнхий сайд надтай тохиролцчихоод одоо худлаа зүйл хэлж байна. Би хуульч хүн учраас баримттай зүйл ярьдаг. Ингэж худлаа зүйл хэлж болохгүй.  Та утсаа олон нийтэд ил зарласангүй. Тань руу хүмүүс эмнэлэгийн асуудлаар мессеж бичих гээд байна.

- Ерөнхий сайд: Чи миний утсыг ил болгож яах гээд байгаа юм. Төрийн тусгай хамгаалалтаас намайг утсаа ил зарлаж болохгүй гэсэн. Би ажил хэргийн шугамаар утасны дугаараа өгдөг.