2014 онд АН ямар бодлого баримтлахаа бараг л “зарлалаа”. Учир нь УИХ дахь АН-ын бүлгийн дарга Д.Эрдэнэбат оны зааг дээр “Хэн ч хөндлөнгөөс хараагүй үед бидний хийж байгаа зүйл- бидний эрх чөлөө юм” хэмээн байр сууриа илэрхийлэв. Түүний энэхүү байр суурийг ухаж бодвол нилээд ноцтой утга санааг илэрхийлэх аж.

    Өөрөөр хэлбэл “хэн ч бидний юу хийж байгааг хөндлөнгөөс л хараагүй бол юу ч хийсэн яадаг юм. Хулгай хийж байгааг ард түмэн хараагүй л бол бидний эрх чөлөө, бидний юу хийх нь бидний л эрх, хамгийн гол нь хөндлөнгөөс хэн нэгэн мэдээгүй байх ёстой” гэх мэт элдэвийн утгыг түүний хэлсэн байр суурь илэрхийлэх талаар түмэн янзын тайлбар хэлж болохоор байна. Хамгийн ноцтой нь яаж ч тайлбарласан “ард түмэн хараагүй л бол дураараа дургиж болно” гэсэн санаа АН-ын бүлгийн даргын байр сууринаас ойлгогдох аж.

   Тиймээс ирж буй 2014 онд АН-ынхан “Бидний хийж байгаа зүйл бидний эрх чөлөө” гэсэн байр сууринаас хандах бололтой. Бас “хэн нэгэн хөндлөнгөөс хараагүй байх ёстой” гэсэн зарчимыг баримтлах аж. Угаасаа АН-ынхан одоо ч бүх асуудлыг олонхиороо түрий барин шийдвэрлэж, ардчиллын зарчим, хууль тогтоомжийг завхаруулж байгаа л даа. Жишээ нь АН-ын үед Монгол улс гурван төсөвтэй болсон. Уг нь хуулиараа Монгол улс УИХ-аар баталуулсан ганцхан төсөвтэй байх ёстой л доо. Сүүлийн үед зарим төсөл тендерийг зарлахаа ч байсан. Шууд л гэрээ байгуулаад бие биенийхээ аж ахуйн нэгжүүдэд өгдөг болсон. Хуулиараа бол бүх л төрлийн тендерийг сонгон шалгаруулалтын дүнд олгох ёстой. Энэ мэтээр эрх баригчдын дураараа дургиж “бидний хийж байгаа зүйл-бидний эрх чөлөө” гэдэг зарчим үргэлжилсээр байна.

   Энэ жил энэ байдлаараа үргэлжилвэл эрх баригчдын “бидний эрх чөлөө” хэмээх түрэмгийлэл улс орныг нилээд туйлдуулах шинжтэй болов.

   Хамгийн гол УИХ дахь бүлгийн даргынх нь энэ мэт утгагүй байр суурь, танхай шинжтэй мэдэгдэл нь олон түмнийг алмайруулж эхлэв.