Энэ оноос хэрэгжих шинэ хуулиуд дундаас эрүүлжүүлэх байрыг эмнэлэгт шилжүүлэх асуудал олон нийтийн анхаарлыг татаж эхэллээ. Согтуу иргэдийг цагдаа нар цагдан хорьж, хонуулаад гаргах биш, эмч нар эмчлээд эрүүлжүүлээд явуулах ёстой гэсэн саналыг иргэд дэмжиж байна. Гэсэн ч энэ хуулийн заалт шинэ он гарсан ч хэрэгжих боломжгүй хэвээр байна. Энэ нь уг хуулийг "түүхий" баталсантай холбоотой.
     Эрүүл мэндийн сайд Н.Удвал ч "Эрүүлжүүлэх байрны асуудлыг ЭМЯ хариуцах ямар ч боломжгүй" хэмээн мэдэгдлээ. Харин Хууль зүйн яамнаас "Анх энэ саналыг гаргаж, хууль батлуулах үед ЭМЯ-наас ямар нэгэн санал ирээгүй. Тийм байж шууд хүлээж авахгүй гэж байгаа нь зохисгүй" гэсэн тайлбар өгч, бие бие рүүгээ шидэлцэж эхлээд байна.

   Эрүүлжүүлэх байр нь цагдаагийн төв байгууллагын харьяалалд ажиллана" гэдэг заалтыг  "Эрүүл мэндийн асуудал эрхэлсэн төрийн захиргааны" болгон өөрчилжээ. Мөн "цагдаагийн алба хаагч" гэснийг "түргэн тусламжийн төвийн ажилтан, эрүүлжүүлэх байрны ажилтан" гэж өөрчилсөн. Гэсэн ч жирэмсэн эх, хүүхэд багачуудаа коридорт хэвтүүлдэг эмнэлгүүдэд согтуу иргэдийг хүлээж авах боломжгүй гэдэг нь нэгэнт тодорхой. Нэг ийм "түүхий" хууль гаргаснаас болж ЭМЯ, Хууль зүйн яамны хооронд үл ойлголцол бий болоод байна.