Хойд Солонгосын залуу дарга Ким Чен Уны төлөө ард түмэн нь уйлж, залбирч “гайхамшигт хүү” хэмээн цаг минут бүр магтан сайшааж байна. Магтаж байна ч гэж дээ тэр ард түмнийг өөрийнхөө төлөө өлсүүлж, зовоож, уйлуулж, ёслуулж сургасан юм.

    Манай Засгийн газрын тэргүүн, АН-ын дарга Н.Алтанхуяг ч Kим Чен Унаас ялгарахаа болив. Шинэ оны өмнөхөн Ерөнхий сайд Н.Алтанхуяг “надад дунд сургуулийн 2-р ангийн хүүхдүүдээс захидал ирсэн” хэмээн шоу хийсэн юм. Уг захидлуудыг уншаад үзэхэд соц үеийн нэг л танил тахин шүтэх далд санааг агуулсанаас гадна хоёр дугаар ангийн 7 настай хүүхдүүдээс гарахааргүй зусар магтаалын үгсээр дүүрэн аж. Тухайлбал 7 настанууд ингэж бичжээ. Бичсэн ч гэж дээ дарга нар үүрэг өгүүлж бичүүлсэн байх л даа!

-    Ерөнхий сайд Н.Алтанхуягаа би таньд хайртай.
-    Та ойн амьтадаа хамгаалаарай.
-    Бид нар таныг маш их дэмжиж байгаа шүү.
-    Улам сайн хичээгээд бид нарт аз жаргалыг авчираарай.
-    Та үргэлж эрүүл байгаарай!
-    Та шинэ жилдээ аз жаргалтай байгаарай!
-    Монгол Улсаа сайхан болгосонд маш их талархаж байна.
-    Би таньтай адил хүн болно.
-    Та их сайн хүн шүү!
-    Би тань шиг онц сурлагатан болно.
-    Та Монгол Улсын Ерөнхийлөгч болоорой.
-    Таныг Монгол Улсаа хөгжүүлсэнд баярлалаа.
-    Улам сайн ажиллаарай!
-    Та бол шилдэг хүн шүү!
-    Таныг сайн хүүхэд байсныг уншсан.
-    Би бас тань шиг ухаантай болохыг хүсч байна.
-    Н.Алтанхуяг ахаа би тань шиг Ерөнхий сайд болно.
-    Бид нарт цэвэр агаар бэлэглэж өгсөнд баярлалаа гээд 7 настнуудын захидал хөвөрч байна.

    Социализмын үед л “дарга нар түм наслаарай”, “та сайн хүн шүү”, “бид тань шиг хүн болохыг мөрөөддөг”, “та эрүүл байгаарай”, “урт насалж биднийгээ жаргаагаарай”, “та гоё эхнэртэй” гэх мэтээр хадуурсан захидал магтаалууд урсдагсан. Тэр цаг эргэн ирж байх шиг. Ардчилсан нийгэмд, АН-ын дарга сурталчилгаандаа хүүхдүүдийг ашиглаж ийм өрөвдөлтэй юм сэтгэх ч гэж дээ! Арга ч үгүй байх л даа. Ард түмэн дэмжихээ байгаад ирэхээр 7 настай хүүхдүүдээр ийм захидал бичүүлж өөрийгөө “сайн ажиллаж” байгаа, “ард түмнээ жаргааж” яваа хэмээн баясдаг биз.

    Дээр үед В.И.Ленин хүүхэд байхдаа таван онцын эзэн байсан. Хүүхэд бүр В.И.Ленин багш шиг болох ёстой гээд авч өгдөгсөн. Эсвэл Kим Чен Ир төрөөд долоо хоногтоо алхаж эхэлсэн. Сод хүмүүс ингэж төрдөг. И.Б.Сталин их сайн хүүхэд байсан гэх мэтээр дарангуйлагчдын тухай домог зохиож хүүхдүүдийн тархийг их сайн угаадаг байсан. Харин одоо Монголын долоон настанууд “Н.Алтанхуяг ахаа би таньд хайртай”, “Бид нар таныг маш их дэмжиж байгаа шүү”, “Бид нарт аз жаргалыг авчираарай”, “Та үргэлж эрүүл байгаарай”, “Та шинэ жилдээ аз жаргалтай байгаарай”, “Та их сайн хүн шүү”, “Бид нарт цэвэр агаар бэлэглэж өгсөнд баярлалаа” хэмээн бичиж байна. Хүүхдүүдээс ийм захидал авсан удирдагч эцэстээ ард түмнийг өөрийнхөө төлөө уйлуулж, өлсгөж өдөр бүр магтахыг шаарддаг өвчтэй болсон түүх олон бий.