Монголчууд хэд хоногийн өмнө шинэ оноо угтаж, баяраа тэмдэглэлээ. Мөн хэдхэн хоногийн дараа Цагаан сарын баяраа тэмдэглэнэ. Үргэлжлээд Эмэгтэйчүүдийн, Цэргийн, Инээдмийн гээд баярууд үргэлжлэх нь тодорхой. Шил дараалсан баярт дарагдах нь эдийн засаг, төсөв мөнгөнөөс эхлээд төвөгтэй зүйл олон ч манайхан алгасахгүй тэмдэглэж л орхидог. Ямартай ч монголчуудын ихэнхи нь эх орондоо ах дүү, найз нөхөд, хамаатан садантайгаа өөрсдийн хэмжээнд баярладаг бол УИХ-ын эрхмүүд маань баяр далимдуулж гадаадад амардаг жишгийг сүүлийн үед тогтоогоод байгаа гэнэ. Тэд үргэлжлүүлээд ажлаа тасалж амардаг ба Монголд юу болж буй нь огт “падгүй” мэт зугаалдаг аж. 

Ирц бүрдүүлдэггүй ажил хийх дургүй гишүүдэд арга хэмжээ авахаар хурууны хээгээр ажлын цагийг нь бүртгэх хүртэл арга хэмжээг ярьсан. Бүр цалинг нь хасахталаар ярьж буй. Гэтэл шинэ жилийн баярыг тохиолдуулан нөгөө эрхмүүд маань бас л ажилдаа ирсэнгүй нэг долоо хоногийг үдлээ. Хувийн хэвшилд ажиллаж цөөн хэдэн төгрөгний цалингаараа амьдардаг иргэдээс бүх нийтийн амралтын өдрөөр ч амарч чадалгүй хоногийн хоолныхоо төлөө ажиллаж байгаа олон хүн бий. Гэтэл ажил нь багадаж, амралт зугаа цэнгэлдээ  бялуурсан аз жаргалтай хүмүүс бол Монголд  УИХ-ын гишүүд л байна.

Шинэ жилээр далимдуулж парламент өнгөрсөн долоо хоногт  ажилласангүй. Учир нь УИХ-ын гишүүдийн олонх нь гадаадад амарч, далайн эрэг дээр биеэ шарангаа коктейл шимж хэвтсэн сурагтай байна. Эрхмүүд эзгүй хойгуур УИХ-ын дарга, хуруу дарам давхар дээлтнүүд гишүүдийг орлож, хуулийн төсөл өргөн мэдүүлж нэг өдрийг өнгөрүүлсэн.

Ирцээ бүрдүүлж чадахаа байсан УИХ-ын дарга аргаа барахдаа “Гадаад яваа 10 гаруй гишүүн байна. Тэдний дөрөв нь л надаас албан ёсоор зөвшөөрөл авсан. Бусад нь зөвшөөрөл аваагүй. Ийм л дүр төрхтэй байна” хэмээн ярьж сууна. Баяр болох бүрийг далимдуулж гадаад далайн эрэг дээр тааваараа тарвалздаг нь өөрсдийнх нь мэдэх асуудал ч ажлаа тасалж амрах нь дэндүү амиа бодсон зүйл биш гэж үү. Иргэдэд хайр зарлан байж УИХ-д суусан атлаа ард түмнийг төлөөлж шийдвэр гаргадаг ажлаас зугатааж гадаад руу хуйлрах нь яав ч зөв жишиг биш. Угтаа бол тэд биднийг төлөөлж шийдвэр гаргах ёстой хүмүүс.
 
Утаатай тэмцэхийн оронд зугатааж гадагшаа явсан эрхэм дарга нар өнөөдөр Англи, Америкт гэр бүлийнхэнтэйгээ тансагласан шигээ амьдарч байгааг сонсохоор дургүй хүрмээр. Тэд утаанаас холдож далайн эрэг дээр хэвтэнгээ, Улаанбаатарын утааг төсөөлж инээд алдаж хэвтдэг биз. Ер нь УИХ гишүүд, цаашлаад төрийн албан хаагчдын дийлэнхи нь Шинэ жил, Цагаан сар гээд үндэсний томоохон баяруудаар эхнэр, хүүхдээ дагуулаад гадаадад тэмдэглэдэг жишиг тогтсон гэж эх сурвалжууд хэлж байна. Сүүлийн үед гишүүдээс илүү төрийн албаны хурган даргаас эхлээд жирийн ажилтнууд олноороо гадаадад амьдардаг болсон аж. Бүр зарим нь нууц амрагтайгаа ч амардаг гэнэ. Саяын шинэ жилээр УИХ-ын нэр бүхий гишүүн Солонгос руу амралтаар нууц амрагтайгаа явж байсан талаар ч эх сурвалж мэдээлэв.

Удахгүй чуулганы хуралдаан завсарлана. Чуулган завсарласан ч ажил мундахгүй л байх ёстой. Бас хуулийн төсөл боловсруулах гэж чухал ажил байдаг. Ер нь чуулган завсарлангуут амралт эхэллээ гэж ойлгодог буруу зуршлаа тайлмаар санагдана. УИХ-ын чуулган  жилдээ хавар, намрын гээд хоёр удаа урт завсарладаг. Нэг завсарлахдаа 2-3 сар амраад байвал жилийн 365 хоногийн хэдэд нь амарч байгаа нь тодорхой болно.  Төрийн албан хаагч болоод хувийн хэвшлийн жирийн ажилтан бид нэг сар, олон жил ажилласан ахмадууд 45 хоног л амардаг. Гэтэл УИХ-ын гишүүд гэхээрээ хүссэн үедээ амарч, зугаалж явдаг, тэр хоног нь ажил тасалснаар бүртгэгдэж, цалингаас нь хасагддаггүй. Аль ч албан газрын албан хаагч гурав хоног хүндэтгэх шалтгаангүйгээр хэл чимээгүй ажил тасалсан бол халагддаг хуультай. Гэтэл УИХ-ын чуулганы дугуй танхимд морилсон нөхдөд ямар ч Хөдөлмөрийн хууль үйлчилдэггүй нь хачирхмаар зүйл биш үү. Манай гишүүд бүрэн эрхтэй атлаа бүрэн үүрэг, хариуцлагатай байж сурмаар юм.