УИХ-ын гишүүн О.Баасанхүү Шинэ жилийн баярын үеэр МАХН-ын дарга Н.Энхбаярыг эргээд ирсэн билээ. Түүний даргатайгаа очиж уулзах болсон шалтгаан нь намын зарим гишүүд нь түүнийг сайтын сэтгэгдэлээр доромжилж, утсаар дарамталж байсантай холбоотой байжээ. О.Баасанхүү өөрийг нь утсаар сүрдүүлж байгаа хүмүүсийг шалгаж өгөхийг хүссэн ч ТЕГ татгалзаж байсан аж. Тиймээс Ерөнхийлөгч Ц.Элбэгдоржид хандан, ТЕГ-аар шалгуулахад хэргийн эзэд нь МАХН-ын зарим гишүүд байжээ. Тэрбээр энэ хүмүүсийн нэрсийг МАХН-ын дарга Н.Энхбаярт хэлсэн бөгөөд хариуд нь Н.Энхбаяр улс төрд эргэж ирнэ гэдгээ хэлсэн байна.

  Ганцаардаад байсан О.Баасанхүү гишүүн ийнхүү намын даргынх нь бие сайжирч, улс төрд эргэж ирэх дөхөж байгаад баяртай байгаа аж. Тэрбээр "О.Баасанхүү хүчгүй байвал Н.Энхбаяр хүчгүй байна гэсэн үг. Н.Энхбаяр даргыг хүчгүй байлгахын төлөө хэсэг, бүлэг хүмүүс ажиллаад байна. Н.Энхбаяр даргыг биологийн насаараа биш ч оюун ухаанаараа ирэх 20 жилд улс төрд байх боломжтой гэж харж байна" гэжээ.