Хуваарийн дагуу өнөөдөр МАН-ын бүлэг хуралдаж хэд, хэдэн асуудал хэлэлцсэний дотор Үйлдвэр хөдөө аж ахуйн сайд Х.Баттулгад хариуцлага хүлээлгэх асуудлыг хөндсөн байна.

 Шинэчлэлийн Засгийн газраас стратегийн хүнс улаан буудайн нөөцийг нэмэгдүүлэх, импортоор авахын тулд 2014 оны зургадугаар сарын 1-ны өдөр хүртэл гаалийн татвар, НӨАТ-аас чөлөөлөх хуулийн төслийг УИХ-д өргөн мэдүүлсэн. Энэ хуулийг энэ долоо хоногт УИХ-ын чуулганаар хэлэлцэнэ. Тиймээс энэ хуулийн төсөл дээр МАН-аас ажлын хэсэг гаргажээ. Ажлын хэсгийг УИХ-ын гишүүн Сү.Батболд ахлах юм байна.  Юуны өмнө энэхүү хуулийн төсөл хэр зэрэг үндэслэлтэйг авч үзэх ёстой гэж МАН-ын бүлэг үзэж байна.

2012 онд "Атрын гуравдугаар аян"-ыг хоёр Засгийн газрын бүрэн эрхийн хугацаанд хэрэгжүүлсний үр дүнд манай улс улаан буудайн дотоодын хэрэгцээг бүрэн хангахын зэрэгцээ экспортлогч орон болсон. Гэтэл нэг жилийн хугацаанд хүрсэн төвшнөөс ухарчээ. Тодруулбал, 2013 оны ургац хураалтын мэдээгээр нийтдээ 369.8 мянган тонн улаанбуудай хурааж авчээ. Үүнийг 2012 онтой харьцуулахад 95.4 мянган тонноор буурсан үзүүлэлттэй байна. Мөн үнэ тогтворжуулах гурван их наяд төгрөгийн өртөгтэй хөтөлбөрийн хүрээнд гурилын хэрэгцээг сайжруулах зориулалтаар 24 гурилын үйлдвэрт 48.7 тэрбум төгрөгийн зээл өгчээ. Энэ хөтөлбөрийн үр дүн гарсан уу, эзэндээ хүрч чадсан уу гэдэг талаас нь үзвэл үр дүн бага байгааг Сү.Батболд гишүүн хэллээ. Тариаланчид Засгийн газарт нэг тонн улаанбуудайг  400 мянган төгрөгөөр худалдах санал хүргүүлсэн ч Засгийн газар 320 мянган төгрөгөөр тогтоосон. Үүнээс болоод тариаланчид рапс тарих талбайгаа нэмэгдүүлж, энэ хэрээр улаанбуудайн тариалалт багассан аж. Манай улс анх 1990 онд үр тариагаар дотоодын хэрэгцээгээ бүрэн хангадаг болсон. Үүнээс хойш үр тарианы хураалт нэмэгдэж 2012 онд гадагшаа буудайгаа экспортлох хэмжээний нөөцтэй байсан. Гэтэл энэ онд Шинэчлэлийн Засгийн газраас 30 гаруй сая доллароор гаднаас улаан буудай авах гэж байна. Ингэж валютын нөөцөө шавхах шаардлагагүй. 2012 онд нөөцийн 100 мянган тонн үр тариа хүлээлгэж өгч байхад одоо гаднаас импортын бүтээгдэхүүн авахад хүрсэн нь салбар хариуцсан сайдын хариуцлагагүй үйлдэл. Тиймээс Х.Баттулга сайдыг хариуцлага хүлээх ёстой гэж Сү.Батболд гишүүн хэллээ. Мөн 2013 онд нөөцөд байсан улаан буудайгаа хэрхэн, яаж зарцуулсан талаарх мэдээдэл огт байхгүйн дээр Х.Баттулга сайдын хэлж буй тоо баримт  зөрүүтэй байгаа учраас Үйлдвэр хөдөө аж ахуйн яаманд МАН-ын бүлгийн зүгээс шалгалт оруулжээ. Тиймээс шалгалтын дүнгээс хамаарч Х.Баттулга сайдыг огцруулах, үгүйг шийднэ гэв. Түүнийг хариуцлагагүй ажиллаж, улаан буудайг хяналтгүй зарцуулсны дээр улсын төсвийн мөнгөөр гаднаас их хэмжээний үр тариа оруулж ирэхэд нөлөөлсөн хүн хэмээн МАН-ын бүлгээс үзэж байгаа юм байна.