УИХ дахь МАХН-МҮАН-ын “Шударга ёс” эвслийн бүлэг хуралдаж, Төрөөс эрдэс баялгийн салбарт баримтлах бодлого батлах тухай УИХ-ын тогтоолын төслийг хэлэлцээд бусад намын бүлгүүдтэй зөвшилцөх ёстой гэж үзсэн байна. Түүнчлэн 2014 онд хэлэлцэж, батлахаар төлөвлөж буй хуулиудын хүрээнд бүлгээс баримтлах ерөнхий чиг баримжаагаа тогтоожээ. "Шударга ёс" эвслийн бүлгийн хувьд олонхийг бүрдүүлж буй Засгийн газрын нэг хэсэг болдог. Гэхдээ өнгөрсөн хугацаанд тус эвслийнхэн олонхийг бүрдүүлэх нэрийн дор эрх баригч АН-ын бодлогуудыг ерөнхийд нь дэмжиж ирсэн. Харин цаашдаа засагт хамтарч буй намын хувьд аль болох бодлого тодорхойлоход түлхүү оролцож, өөрсдийн намынхаа мөрийн хөтөлбөр, бодлого, чиглэлүүдийг ч хэрэгжүүлэхийн төлөө 2014 онд ажиллана гэдгийг эвслийн бүлгийн дарга Н.Батцэрэг мэдэгдлээ. Мөн энэ тал дээр Ардчилсан намынхан ч бас харилцан ойлголцож, хамтрагч намынхаа бодлогыг дэмжиж ажиллана гэдэгт итгэж буйгаа илэрхийлсэн аж. Тиймээс 2014 онд олонхийг бүрдүүлж байгаа хэсэг Засгийн газраа үр дүнтэй ажиллуулах бололцоог хангах, ажил хариуцаж байгаа хүмүүсийн хариуцлагатай холбоотой асуудлыг түлхүү ярих, өргөн баригдаж байгаа хуулийн төслүүд дээр харилцан бие биенийхээ саналыг хүндэтгэн, төрийн бодлого болгох чиглэлээр ойлголцож ажиллах жил байх учиртай. Мөн бүлэг дээр  зохион байгуулсан ажлын хэсгүүдээ илүү үр дүнтэй ажиллуулах зорилгоор  мэргэжлийн болон салбарын судлаачдыг татан оролцуулах талаар ярилцсан байна.

Мөн Төрөөс эрдэс баялгийн салбарт баримтлах бодлогод баялгийн ордыг нөөцлөн хадгалах тухай заалт багтсан байсан ч ажлын хэсгээс хасах санал гарч улмаар байнгын хорооноос дэмжлэг хүлээсэн байдаг.

Мөн уул уурхайн ашигт малтмалын ордын анхны үнэлэмжийг тогтоох тухай заалт уг бодлогод тусгагдаагүй байна. Түүнчлэн тухайн ордын  нөөцөөс хамаараад дагалдсан дэд бүтцийг заавал байлгах ёстой аж. Тиймээс тус бүлгийн гишүүд болох Г.Уянга нар хэрвээ ордыг ашиглавал дагалдсан хот сууринг босгох ёстой гэж үзсэн байна. Хэрэв энэхүү заалтууд бодлогын баримт бичигт тусч чадахгүй батлагдвал Монгол Улс эрдэс баялгийн салбарт баримтлах бодлого дээрээ ухралт хийнэ гэж бүлгийн гишүүд үзжээ.