Хамгийн сүүлд Д.Тэрбишдагва, УИХ-ын гишүүн О.Баасанхүү хоёр БНСУ-д уралдаж газардсан мэдээлэл байна. Учир нь төрийн ордонд муудалцсан энэ хоёр дарга хэн нь түрүүлж Н.Энхбаяр дээр очихоо харнаа хэмээн өрөөнөөсөө гарцгаажээ. Тэгээд тэр оройдоо Д.Тэрбишдагва БНСУ-д эмчлүүлж буй даргынхаа байгаа эмнэлэгт очиж чадсан аж. Харин маргааш нь УИХ-ын гишүүн О.Баасанхүү хүрэлцэн очжээ. Ингээд БНСУ-д эмчлүүлж буй Н.Энхбаярын өрөөнд хэн нь зөв буруу яриад байгаагаа дэнсүүлсэн аж.

    Эх сурвалжийн мэдээлж байгаагаар бол Н.Энхбаяр энэ хоёр эрхэмд нилээд таагүй ханджээ. Дотооддоо учраа олж чадахгүй энэ хүртэл бие биенээсээ уралдан ирж матаас хийж байгаад дургүйцлээ илэрхийлсэн аж. Тэр ч бүү хэл “намайг анх энд ирж хэвтэхэд ингэтлээ хурдан ирээгүй атлаа хэрүүлээ шийдвэрлүүлэх гэж яарч ирсэнд нь” сэтгэл дундуур байгаагаа ч цухуйлгажээ. Мөн эмнэлгээс гарахын өмнөхөн гэр бүлийнхнээс нь зугтаагаад уулзахгүй байсан талаар ч гомдолын үг цухуйлгажээ. Ерөнхийдөө Н.Энхбаяр 2014 онд улс төрд эргэж ирнэ. Тэгэхдээ “та нарыг ингэж муудалцаад учраа олохгүй гишүүдээ талцуулаад байвал шинэ баг бүрдүүлнэ” гэсэн утгатай үг хэлсэн байна. Угаасаа Н.Энхбаяр шинэ залуусаар баг бүрдүүлэхээр ажиллаж эхэлсэн гэсэн мэдээлэл эртнээс тархаж эхэлсэн нь үнэн бололтой.

    Н.Энхбаярын эмнэлэгт уралдаж очсон Д.Тэрбишдагва, О.Баасанхүү хоёр маргаанаа шийдвэрлүүлэх гэхээсээ илүү зэмлэл хүртээд буцсан аж. Тухайлбал О.Тэрбишдагвыг “намынхаа бодлогыг явуулмаар байвал явуул. Эсвэл энэ намаа тараа. Ажил хийвэл хийсэн шиг хий. Хийж чадахгүй бол чаддаг хүмүүст нь өг” гэсэн бол О.Баасанхүүг “хэмжээ хязгаартай бай. Аливаа юм эх захтай” гэх мэтээр хэлсэн гэж МАХН-ынхан ярьж байна.

    Д.Тэрбишдагва, О.Баасанхүү хоёр энэ уулзалтын дараа тусдаа явсан шигээ тусдаа ирцгээжээ.   

    Д.Тэрбишдагва уулзалтынхаа талаар намынхаа гишүүдэд ярихгүй чимээгүй яваа бол О.Баасанхүү эсрэгээрээ байна. Тэрээр “Би Н.Энхбаярын өмгөөлөгч. О.Баасанхүү хүчгүй байвал Н.Энхбаяр хүчгүй байна гэсэн үг. Н.Энхбаяр дарга намайг биш Д.Тэрбишдагвыг загнасан” гэх мэт элдэвийн юм ярисаар явна. Нэгд О.Баасанхүү одоог хүртэл УИХ-ын гишүүн биш Н.Энхбаярын өмгөөлөгч гэсэн дүрдээ итгэчихсэн явна. Хоёрт тэрээр өөрийгөө Н.Энхбаярын хүч чадлын эхлэл ч юмуу эсвэл Н.Энхбаярыг хүчтэй харагдуулах зүйлийг хийх ёстой гэх мэт бурсаар сууна.  

    Ийнхүү Н.Энхбаярын “бор оймсны” хүчээр гарч ирсэн улс төрчид учраа ололцохгүй ойр ойрхон БНСУ-д очиж асуудлаа шийдвэрлүүлдэг шинэ жишиг тогтоожээ.