Бүтэн жил гаруй хугацаанд үргэлжилж буй 2012 оны УИХ-ын сонгуулийн 15-р тойрог буюу Увс аймгийн маргааныг  Сонгуулийн ерөнхий хороо  /СЕХ/ шийдвэрлэнэ гэсэн байр суурийг АН-ын зүгээс өгсөн. Тодруулбал, шүүхийн бүх процесс дуусч, МАН-аас нэр дэвшсэн Ч.Хүрэлбаатар, Б.Чойжилсүрэн нарын туслах, штабын ажилтан, нэр дэвшүүлсэн намын дэд дарга нар мөнгө тараасан үйлдлийг тогтоож, долоо хүнд ял шийтгэл ноогдуулсан байгаа билээ. Тиймээс СЕХ нь Эрүүгийн шүүхийн шийдвэрийг үндэслэн маргааныг эцэслэн шийдвэрлэх боломжтой гэсэн шийдвэр гарсныг АН-ын удирдлагууд болон АН-аас Увс аймагт нэр дэвшигчид албан ёсоор мэдээлсэн юм. 

Харин уг асуудлын эцсийн хариуг СЕХ-ын дарга Ч.Содномцэрэн өнгөрсөн сарын 27-ны өдөр АН-ын Ерөнхий нарийн бичгийн дарга Ц.Оюундарьд хүргүүлжээ.

Үүнд: Захиргааны хэргийн давж заалдах шатны шүүхээс тус маргааныг СЕХ шийдвэрлэх ёстой гэсэн шийдвэрийг 2012 оны зургадугаар сарын 30-ны өдөр гаргасан. Гэвч Улсын дээд Шүүхийн хяналтын шатны захиргааны хэргийн шүүх хуралдаад дээрх шийдвэрийг бүхэлд нь хэрэгсэхгүй болгож шийдвэрлэжээ.

Үүний дараа Увс аймгийн Ардчилсан нам болон Д.Нямхүү, Т.Мэндсайхан нар Улсын дээд шүүхийн хяналтын шатны  захиргааны хэргийн шүүх хуралдааны тогтоолыг шинээр илэрсэн нөхцөл байдлын улмаас хянуулах тухай хүсэлт гаргасан. Уг хүсэлтийг Улсын дээд шүүх хянан үзэж, Увсын сонгуулийн маргааныг СЕХ эцэслэн шийдвэрлэх ёсгүй гэсэн шийдвэрийг гаргасан байна. Тиймээс шүүхийн дээрх шийдвэр хүчин төгөлдөр байгаа тул танай албан бичигт дурдсан хүсэлтийг Сонгуулийн Ерөнхий хороо хангаж шийдвэрлэх боломжгүй гэж үзсэн болно гэж бичжээ.

Ямартай ч Увс аймгийн сонгуулийн маргаан шүүхээр эцэслэгдэн шийдвэрлэгдсэн бөгөөд СЕХ уг асуудалд оролцохгүй гэдэг нь хуулиар шийдвэрлэгдсэн байна.