УИХ-ын гишүүн Л.Эрдэнэчимэгтэй "11 11" төвд ажилласан талаар нь ярилцлаа.

-    Та хэдэн хүний саналыг “11 11” төвөөр дамжуулж сонсож чадсан бэ?

-   Холбогдохыг хүссэн маш олон дуудлага ирсэн боловч би 200 гаруй хүнтэй утсаар холбогдож, 15 хүнтэй биечлэн уулзлаа. Мөн “11 11” төвийн дуудлага хүлээн авагч нар маш олон саналыг хүлээн авч бичиж ирүүлсэн байгаа.

-    Иргэдээс голчлон ямар санал, гомдол ирсэн бэ? 

-  Ихэвчлэн СХД-ийн иргэд холбогдож байсан бөгөөд манай дүүргийн иргэдийн нийтлэг асуудал болох газрын асуудал, тог цахилгааны асуудал, худаг усны асуудал их байлаа. Хувийн гуйлт ч бас их байсан. Эмчилгээний зардал, сургалтын төлбөрийн зардал, байрны зээл, жижиг бизнесийн зээл гэх мэт гуйлт их байлаа. Ахмадын түрээсийн байранд хамрагдах тухай, ажилласан жилийн нөхөн олговор, тэтгэвэр нэмэгдүүлэх талаар болон хүүхэд харах үйлчилгээ хэзээ нэвтрах, гэртээ хүүхдээ хараад сууж байгаа ээж нарт олгох мөнгө зэрэг асуултууд их байсан. Энэ хуулиудыг хүлээсэн хүлээлт их байгаа нь харагдаж байсан.

-  “11 11” төвд ажиллах ямар санагдав. Ер нь хэр ачаалалтай ажилладаг юм байна?

-  Энэ төвийг иргэд маш сайн мэддэг болсон юм байна, тасралтгүй утсаар санал хүсэлт ирж байсан, иргэдэд төртэй харилцахад тулгамдсан асуудал их гардгийг энд нэлээд хөнгөвчилж өгдөг юм байна гэж ойлгосон.

-  Иргэдээс ирсэн саналын дагуу ямар ажлыг хамгийн түрүүнд хийхээр төлөвлөж байна?

-  Холбогдсон иргэдийн хүсэлтийг өргөдлөөр эргэж авахаар тохиролцсон тул энэ хоногуудад өргөдлүүд нэлээд ирэх байх. өргөдөл дээр үндэслээд холбогдох газрууд руу асуулга хийнэ. Тэгээд эргэж мэдээлнэ. Мөн хоёрдугаар сард дүүрэг дээр хийх уулзалтуудаа товлосон. Жишээ нь газрын асуудалтай байгаа Баруун салааны 30 айлтай 2 сарын 15-нд газар дээр нь очиж уулзах, дүүргийн газрын албаныхантай хамт очихоор тохирсон. Ийм хэд, хэдэн уулзалтууд товлосон. Дараа долоо хоногт 107-р цэцэрлэг дээр очиж дутуу байгаа хөнжил гудас, гал тогооны хэрэгслийг хэрхэн шийдэх талаар ярилцана.

-  Тойрогтоо биечлэн очиж ажиллахгүйгээр утсаар иргэдтэй холбогдсоны учир нь юу вэ?

-  Би тойрогтоо байнга очиж ажилладаг. Манай дүүрэг 280.000 хүн амтай. Иргэд зарласан уулзалтад бүгд ирж чадахгүй шүү дээ. Уулзахыг хүссэн иргэд маш их байдаг. Жишээ нь хүүхдээ хараад гэртээ сууж байгаа эмэгтэй надтай холбогдох ганц боломж нь утсаар ярих шүү дээ.