Улсын Их Хурлын чуулганы 2014 оны 1 дүгээр сарын 10-ны өдрийн хуралдаан Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төсөл, түүнтэй холбогдуулан боловсруулсан “Газар тариалангийн үйлдвэрлэлийн тогтвортой хөгжлийг хангах тухай” Улсын Их Хурлын тогтоолын төслийн анхны хэлэлцүүлгээр эхэллээ.Үүгээр хүнсний улирлын нөөц бүрдүүлэхэд шаардагдах улаан буудайг импортоор оруулах асуудлыг зохицуулахаар товложээ.
Төслийн талаарх санал дүгнэлтийг холбогдох Байнгын хороог төлөөлж УИХ-ын гишүүн С.Баярцогт, Б.Гарамгайбаатар нар тус тус танилцуулав.
Эдгээр санал дүгнэлттэй холбогдуулан Улсын Их Хурлын гишүүд асуулт тавьж хариулт авав. Төсөлд тусгасан хэмжээний улаан буудайг импортоор оруулах шаардлага байгаа эсэх, бодит хэрэгцээ нь ямар байгаа, оруулж ирснээр гурилын үнэ өсөхгүй байх,тариаланчдад тариалангийн үйлдвэрлэл эрхлэх сонирхолд сөргөөр нөлөөлөхгүй байх баталгаа бий юу, газар тариалангийн талаар баримтлах бодлогыг хэдийд тодорхойлох, мэргэжлийн холбоодын санал хүсэлтийг харгалзсан эсэх талаар асуулт тавьж хариулт авав.
Дараа нь хэлэлцэж байгаа дээрх асуудалтай холбоотой зарчмын зөрүүтэй саналын томьёлолоор санал хураалт явуулж дуусгаж улмаар эцсийн хэлэлцүүлэгт бэлтгүүлэхээр холбогдох байнгын хороодод шилжүүллээ.
Улсын Их Хурлын гишүүд “Төрөөс эрдэс баялгийн салбарт баримтлах бодлого батлах тухай” Улсын Их Хурлын тогтоолын төслийн эцсийн хэлэлцүүлгийг үргэлжлүүлэн хийхээр товлосон боловч Улсын Их Хурал дахь МАН-ын бүлгийн саналыг харгалзан уг асуудлын хэлэлцүүлгийг хойшлуулав.
Тиймээс чуулганаар хэлэлцэх асуудлын хуваарийн дагуу “Хөгжлийн бодлого төлөвлөлтийг боловсронгуй болгох тухай” Улсын Их Хурлын тогтоолын төслийг хэлэлцэх эсэх асуудлыг хэлэлцлээ.
Тус асуудлаарх хууль санаачлагчийн илтгэлийг УИХ-ын гишүүн С.Бямбацогт, Эдийн засгийн Байнгын хорооны санал дүгнэлтийг УИХ-ын гишүүн Д.Ганбат нар тус тус танилцууллаа.
УИХ-ын гишүүд тавьсан асуултдаа, хэлэлцэж буй асуудлыг өмнөх бодлогын баримт бичгүүдтэй хэрхэн уялдуулсан, түүнийг хэрэгжүүлэх баталгааг хэрхэн бий болгох, бусад улс орон хөгжлийн бодлого, чиг хандлагаа хэрхэн боловсруулж, тодорхойлж, хэрэгжүүлж буй, энэ хүрээнд улс төрийн ямар арга механизмыг ашиглан зөвшилцдөг туршлагыг судалсан эсэхэд анхаарал хандуулсны зэрэгцээ энэ баримт бичгийг зөвшилцлийн баримт бичиг болгох, Улсын Их Хурал тулгамдаад буй асуудлыг Монгол Улсын хөгжлийн бодлогод нэг мөр цэгцэлж тусган улмаар түүнийг ирэх намар хэлэлцэж дуусгах гэсэн санал дэвшүүлж байв.
“Хөгжлийн бодлого төлөвлөлтийг боловсронгуй болгох тухай” Улсын Их Хурлын тогтоолын төслийг Улсын Их Хурлын гишүүдийн олонх хэлэлцэхийг дэмжсэн тул түүнийг дараагийн хэлэлцүүлэгт бэлтгүүлэхээр байнгын хороодод шилжүүлэв.
Үүгээр Улсын Их Хурлын чуулганы өнөөдрийн үдээс өмнөх хуралдаан ажлаа өндөрлөв.
