УИХ-ын чуулганы нэгдсэн хуралдаанаар Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүдийн анхны хэлэлцүүлгийг хийлээ. Хуулийн төсөлд тусгаснаар нөөц бүрдүүлэх зорилгоор 100 мянган тонн хүртэл улаан буудайг импортоор оруулж ирэхэд Гааль болон НӨАТ-аас чөлөөлнө гэж үзэж байна. Татварын чөлөөлөлт ирэх зургадугаар сарын 1-н хүртэл хамаарна. Төрөөс мөнгө гаргахгүй, гурилын үйлдвэрүүд хөрөнгө гаргаж улаан буудай оруулж ирэх юм байна.

УИХ-ын гишүүн Л.Эрдэнэчимэг “Гурилын үйлдвэрүүдээс хивэг гардаг. Фермерүүд хивэг худалдаж авч үхрээ тэжээдэг. Гарсан сүүгээ сүүний үйлдвэрүүдэд  нэг литрийг нь 300 төгрөгөөр худалддаг. Гэтэл Үйлдвэр хөдөө аж ахуйн яаманд сүү үйлдвэрлэлийг нэмэгдүүлэхэд баримталдаг бодлого гэж алга. Наад зах нь хивгээ дотоодынхоо фермэрүүдэд нийлүүлчихээч ээ гэж яамнаас таван сарын турш гуйлаа. Хүлээж авсангүй. Нэг тонн хивэг 120 мянган төгрөг байсан, одоо үнэ нь гурав дахин нэмэгдээд тонн 360 мянган төгрөг болсон. Үнэ нь гурав дахин нэмэгдсэн ч хивэг фермэрүүдэд олддоггүй. “Алтан тариа”, “Милл хаус” зэрэг гурилын томоохон үйлдвэрүүд хивгээ БНХАУ-р уу экспортолж байна. Гэтэл дотоодынхоо фермэрүүдийг хивгээр хангахад жилд 600 тонныг нийлүүлэхэд л хангалттай. Энэ өвлийг давахад 200 тонн хивэг хэрэгтэй. Хэрвээ дотоодынхоо фермэрүүдийг хивгээр хангачихвал нийслэлчүүдийн багагүй хэсэг нь үнээний цэвэр сүүгээр хангагдах боломжтой. Хятад улс руу экспортлогддог хивэг фермэрүүдэд нь очоод эргээд хятад хуурай сүү Монголд нийлүүлэгдэж байна. Хөдөө аж ахуйн яам хэзээ үнээний фермэрүүддээ хивэг нийлүүлэх вэ. Үүнд хариулт өгөөч” гэсэн юм. Гэвч УИХ-ын даргын зүгээс “Энэ асуудалд одоо сайд Х.Баттулга хариулт өгөх боломжгүй. Асуулга тавьж, хариултаа өг” гэж үзсэн учраас хариултгүй үлдэв. Иймд УИХ-ын гишүүн Л.Эрдэнэчимэг УИХ-ын чуулганы нэгдсэн хуралдаанаар асуулга тавьж хариу авахаар бэлдэж эхэллээ.