Төрийн албаны зодоон, заналхийлэл Шинэчлэлийн Засгийн газрын үед хүчээ авлаа. БСШУЯ, ГХЯ, Гааль, Гадаадын иргэн харьяатын алба, Нийслэлийн боловсролын газар, Санхүүгийн зохицуулах хорооны зарим дарга нарын зодоон түмэн олны чихийг дэлдийлгэж байна. Энэ мэт төрийн албан дахь зодоон хүрээгээ тэлж эцэстээ Төрийн ордонд УИХ-ын гишүүнийг чуулганы үүдэнд нь заамдан авч заналхийлэхэд хүргэлээ. Монгол төр хэзээ ч ингэж замбараагүй болж сульдаж байгаагүйг олон эх сурвалж гайхан тайлбарлаж эхлэв.

    Өчигдөр УИХ-ын нэгдсэн чуулганд С.Дэмбэрэл Эрүүгийн хуулийн нэмэлт өөрчлөлтөд оруулах асуудлаар эсрэг байр суурьтай санал хэлснийхээ төлөө заамдуулж хоолойгоо боолгуулжээ. УИХ-ын гишүүний хоолойг боож төрийн ордонд танхайрсан этгээд нь Монгол банкны Хууль эрх зүйн газрын захирал Г.Эрдэнэбаяр мөн болохыг TV10 телевизийн сэтгүүлч нотоллоо. Тэрээр “С.Дэмбэрэлээ чамд хоёрхон жилийн хугацаа байгаа шүү. Дарвалзаад байгаарай” хэмээн гараа зангидан хараал урсгажээ. Эрүүгийн хуульд нэмэлт өөрчлөлт оруулахын эсрэг санал өгсөний төлөө Монгол банкны Хууль эрх зүйн газрын захирал яахаараа УИХ-ын гишүүнийг зодох гэж дайрдаг нь анхаарал татаж байна. Өөрөөр хэлбэл Эрүүгийн хуулийн нэмэлт өөрчлөлтийн цаана эрх ашгаа хамгаалах гэсэн бүлэг ажиллаж эхэлжээ. Тэд УИХ-ын гишүүдийг хүртэл айлган сүрдүүлдэг боллоо. Энэ асуудал яах аргагүй том дуулианы эхлэл болох нь гарцаагүй. Хамгийн хачирхалтай нь УИХ-ын гишүүн С.Дэмбэрэл энэ талаар “сүртэй юм болоогүй, битгий асуудал болго л доо, буруу ойлгоод тайлбарласан юм болов уу” хэмээн айчихсан твитертээ бичиж үлдээжээ. Түмэн олны нүдэн дээр болсон явдлыг намжаах гэж гүйж байгаагийн цаана ямар айдас байна вэ?