АН-ын дэргэдэх Ардчилсан Залуучуудын холбоо хоёр өдөр хуралдаж шинэ тэргүүнээрээ Жижиг, дунд үйлдвэрлэлийг дэмжих сангийн захирал Б.Баттүвшинг сонголоо. Ийнхүү Ардчилсан намын Залуучуудын холбоог дараагийн сонгуульд Б.Баттүвшинг толгойлох болсонд МАН-ын залуус их баяртай байгаа гэж эх сурвалж мэдээллээ. Тэр ч бүү хэл МАН-ын залуучуудын байгууллагын удирдлагад байдаг хэсэг залуус энэ баярыг тэмдэглэсэн байна.

    АН-ын залуучууд шинэ удирдлагаа сонгож байхад МАН-ын залуус яахаараа баярлаж, хундага тулгадаг билээ гэдэг сонирхролтой. Учир нь АН-ынхан сонгууль болохоор л МАН-ын залуучуудын байгууллагыг мөрийтэй тоглоомчид, төрийн мөнгийг идэж уугсад гэх мэтээр элдэвээр хэлэн сурталчилдаг аж. Харин тэгвэл АН-ын залуучуудын холбооны шинэ тэргүүн Б.Баттүвшин гэгч нь сайн гэгч нь мөрийтэй тоглоомчин гэж яригдаж эхэлжээ. Тэр ч бүү хэл мөрийтэй тоглож байгаад цагдаа нарт гардуулж явсан удаатай гэнэ. Өөрөөр хэлбэл АН-ын шинэ тэргүүний талаарх элдэв мэдээлэл МАН-ын залууст байдаг бололтой. Тэгээд л хундага тулгацагаажээ. Тэгээд ирэх сонгуульд АН-ын залуучуудын байгууллага сулаас гадна асуудал ихтэй даргатай боллоо хэмээн баярлацгаажээ. Өмнө ч Б.Болор хэмээх дуугардаггүй даргатай байсан л даа. Б.Болор гишүүн одоо болтол хэлд оролгүй хоёр жилийн нүүртэй золгов. АН-ынхны хувьд Залуучуудын байгууллагын удирдлагаа нэг ч их дээрдүүлж чадаагүй зиндааных нь л хүнийг сонголоо.

    Бас МАН-ын залуучуудын байгууллагыг дан дарга нарын хүүхдүүдээс бүрдсэн хунтайж нарын цуглуулга гэсэн шүүмжлэлийг АН-ынхан өрнүүлдэг. Өөрсдөө ч адилхан болсон байна. Учир нь АН-ын залуучуудын байгууллагын ерөнхийлөгч Б.Болор нь дэд сайд байсан Баярбаатар гэх хүний хүүхэд. Харин шинэ тэргүүн Б.Баттүвшин нь УИХ-ын гишүүн асан Р.Бадамдамдингийн хүү. Бас АН-ын залуучуудын байгууллагын удирдлагад УИХ-ын гишүүн байсан одоо байгаа нилээд хэдэн хүний хүүхдүүд ч багтаж.

    Эцсийн эцэст МАН, АН-ын залуучуудын байгууллага хэн нь хэнийгээ хэлэлтгүй адилхан л болцгоолоо. Уг нь ард түмэн АН-ын залуучуудын байгууллагыг арай нэр цэвэр хэмээн хардаг байсан нь ингээд талаар өнгөрлөө.

    Бас Жижиг, дунд үйлдвэрийг дэмжих сан гэж нилээд мөнгөтэй газар бий. Энд дарга нар өөрсдийн ойрын хүнээ биш хамаатан садангаа заавал шургуулахыг хичээдэг. Өмнө У.Хүрэлсүхийн төрсөн дүү У.Отгонбаяр хэмээх залуу захирлаар нь ажиллаж байсан. Харин одоо УИХ-ын гишүүн асан Р.Бадамдамдингийн хүү удирдаж байна. Р.Бадамдамдин нь АН-ын гишүүд дундаа нилээд мөнгөтэйд тооцогддог. Барилгын биржийг дампууруулсан гэсэн гавьяатай. Хамгийн сүүлд төрсөн ахтайгаа хамт Соёмбо хэмээх 30 давхар цогцолборыг драмын театрын хойно босгож байгаа нэгэн.

    Ийнхүү АН-ын Залуучуудыг тус намын нөлөө бүхий гишүүн Р.Бадамдамдингийн мөнгөтэй бас асуудалтай хүү ирэх сонгуульд удирдаж орохоор боллоо.