Өнгөрсөн долоо хоногт Монгол Улсын ерөнхийлөгч Ц.Элбэгдоржийн төрийн өмчийн зарим байруудын талаар гаргасан зарлиг олон нийтийн анхаарлыг татаж байна. Ерөнхийлөгчийн энэхүү зарилгаар нийслэлийн захиргааны “Хангарьд” одонг түрээсийн зориулалтаар хувьчилж, тагнуул, цагдаа, онцгой байдлынхаас бусад агентлагуудыг төвлөрүүлэхээр болсон юм. Мөн Н.Энхбаярын гэх ордны хажуу дахь балгасыг нурааж хувийн хэвшлийнхэнд өгч томоохон барилга бариулж, түрээсийн нөхцлөөр Гадаад харилцаа, Батлан хамгаалахаас бусад яамдыг төвлөрүүлэх чиглэл өгсөн билээ. Энэ шийдлийг ухаалаг төрийн эхний алхам хэмээн тайлбарлаж байгаа.

    Тэгвэл Ерөнхийлөгч Ц.Элбэгдоржийн дараагийн гаргах шийдвэр өмнөхөөсөө илүү дуулиан дагуулж мэдэхээр байна. Учир нь Ерөнхийлөгч төрийн мэдэлд байгаа бүх автомашинуудыг заруулж төр түрээсийн автомашин хэрэглэх талаар шийдвэр гаргаж магадгүй байгаа аж. Өөрөөр хэлбэл төрийн бүх унаа түрээсийнх болж мэдэх нь. Хэрэв ийм шийдвэр гаргавал жолоочийн цалин, нийгмийн даатгал гээд бүх л асуудлыг түрээслэгч хувийн хэвшлийнхэн хариуцах юм. Үр дүнд нь төрийн нүсэр хэрэглээ багасч, төсөв хэмнэгдэнэ гэсэн судалгаа гарч байгаа бололтой. Мөн үүнийг дагаж эдийн засаг тэлж, хувийн хэвшлийнхэн хөл дээрээ босох боломж нээгдэнэ гэж зарим эх сурвалжууд тайлбарлаж байна.

    Ямар ч гэсэн Монгол Улсын Ерөнхийлөгч ийм нэгэн зарлиг, чиглэл гаргахаар тодорхой судалгаа хийлгүүлж эхэлсэн сураг гарлаа.

    Хэрэв энэхүү судалгаа нь улс орны эдийн засаг цаашдын хөгжилд хэрэгтэй гэж гарвал албан ёсных болно. Харин эсэргүүцэн үгүйсгэх хүмүүсийн тоо нилээд нэмэгдэж магадгүй юм. Тэд төрийг өмчгүй болгох гэж байна. Төр өөрийн гэсэн өмчтэй байх ёстой. Бусад орнуудын төр засаг ч гэсэн өөрсдийн гэсэн унаа тэрэгтэй байдаг гэх мэт түмэн янзын тайлбар гаргалгааг гаргаж ирэх болно.

    Энэхүү эсэргүүцлийн хариуд нэгэн тайлбарийг эрх баригчид бэлдсэн байна. Тэр нь “Шинэ бүтцэд орохыг хуучнаас ашиг олдог хүмүүс л эсэргүүцнэ” гэсэн утга агуулгатай байх бололтой. Ийм сурталчилгаа хүчтэй явбал эсэргүүцэгчдийн эгнээ буурч мэдэх юм. Юутай ч гэсэн ийм нэгэн шийдвэр дуншиж байгаа гэж эх сурвалж мэдээллээ.