МАН-ын Ерөнхий нарийн бичгийн дарга Ж.Мөнхбат, УИХ-ын гишүүн Д.Оюунхорол, Су.Батболд, Д.Сумьяабазар, Нийслэлийн Иргэдийн хурлын төлөөлөгч Д.Энх-Амгалан нар өнөөдөр нийслэлийн алслагдсан хороо болох Өлзийт хороололд ажиллалаа.

 УИХ дахь МАН-ын бүлгээс цалин, тэтгэвэрийг 30 хувиар нэмэгдүүлэхээр таван хуулийн төсөл өргөн барьсан. Мөн малчдын тэтгэврийн даатгалын шимтгэлийг боловсронгуй болгох хуулийн төсөл  өргөн мэдүүлэх гэж байгаатай холбогдуулан санал авах үүднээс иргэдтэй ийнхүү уулзжээ. Харин малчид энэ хуулийн эрэгтэй хүн 55,  эмэгтэй хүн 50 настайдаа тэтгэвэрт гарах талаар заалт оруулсан байгааг дэмжиж байгаагаа илэрхийллээ. 

Түүнчлэн МАН-ынхан УИХ-аас баталж буй хууль тогтоомж, ЗГ-аас хэрэгжүүлж буй бодлого иргэдийн амьдралтай хэр уялдаж байгаа талаар тэдний саналыг уулзалтаар сонслоо. Иргэдийн зүгээс цалин, тэтгэвэр хүрэлцэхээ байсан, нэмэх зайлшгүй шаардлагтай байгаа, ер нь эхчүүд, хүүхдүүд, ахмадуудад чиглэсэн тэтгэмж, төрийн бодлого дутмаг, мөн хөдөлмөр эрхлэлт, тэтгэвэрт гарах тал дээр малчид хамгийн их хохирдог гэдгийг хэлэв. Түүнчлэн Өлзийт хороололд орон нутгийн өөрөө удирдах ёсыг бэхжүүлэх шаардлагатай гэдгийг иргэдийн зүгээс санууллаа. Өлзийт хороололынхныг төлөөлж төрд дөрөвхөн хүн алба хашдаг ажээ. Энэ нь 4000 гаруй хүн амтай уг хороололд хангалтгүй тоо бөгөөд улсаас хувиарлагдаж буй мөнгө нь ч хүрэлцээ муутай байдаг талаар тэд ярьсан юм. Харин уулзалт зохион байгуулж буй МАН-ын гишүүд энэ бүхнийг хэлэлцэж, шийдвэрлэхийн төлөө ажиллана гэдгээ амлалаа.