Хууль зүйн сайд цагдаагийн байгууллагыг шинэчлэх ажлаа үргэлжүүлж байна. Энэ зорилгоор нилээд олон хуульд нэмэлт өөрчлөлт оруулахаар болов. Гэхдээ Х.Тэмүүжин сайдын цагдаагийн шинэчлэл хоёр зүйлийн өмнө хүчгүйдэж эхэлжээ. Нэг нь цагдаад заавал өөрсдийн хүнээ шургуулах гэсэн улс төрчдийн дарамтууд. Нөгөө нь хөрөнгөжсөн хурандаа нарын олон жилийн турш байгуулсан бат бөх сүлжээ гэнэ.

    Энэхүү хоёр бэхлэлтийн өмнө Х.Тэмүүжин сайдын шинэчлэлийн бодлого хүчгүйджээ. Тиймээс хууль зүйн сайд Х.Тэмүүжин олон нийтээс дэмжлэг авахаар шийдсэн байна. Энэ зорилгоор “Өр төлж дуусдаггүй улс төрчид цөөрөөгүй цагт цагдаагийн шинэчлэл бодсоноос илүү цаг, хүч шаардах нь дээ” хэмээн санаа алдан санааширч эхлэв. Х.Тэмүүжин сайд зүгээр л “өр төлж дуусдаггүй улс төрчид” гэж байн байн гомдоллож суухаар тэднийхээ нэрийг зарлах хэрэгтэй л дээ. Миний шинэчлэлийн бодлогод ийм улс төрчид чагт, тээг тавьчихаад байна. Би ийм хүмүүсийг өр төлж дуусдаггүй улс төрчид гэж нэрлэж байна хэмээн зарлах нь зөв л дөө. Үнэхээр Хууль зүйн сайд ямар гишүүдийг “өр төлж дуусдаггүй улс төрчид” хэмээн битүү, хатуугаар сануулах болов гэдэг анхаарал татаж байна. Энэ асуудалд олон нийт ч анхаарлаа хандуулах ёстой.

    Өнгөрсөн хорин дөрвөн жилд Монголын нийгмийн олон зүйл өөрчлөгдөн шинэчлэгдэж ирсэн. Харин ганцхан цагдаагийн байгууллагын хуучинсаг байдал иргэдийг их бухимдуулдаг. Магадгүй шинэчлэгдээгүй үлдсэн цөөхөн салбарын нэг л дээ. Одоо тэгээд шинэчлэх гэхээр улс төрчид нь бизнесийнхээ эрх ашгийг хамгаалаад хэвтчихээд байгаа бол ард түмний дэмжлэгтэйгээр шинэчлэх ёстой л доо.

    Бас цагдаагийн шинэчлэлийн эсрэг байгаа хөрөнгөжсөн хурандаа нарын бүлэглэлийг ард түмэнд бас задалж харуулах ёстой. Тэд өнгөрсөн хугацаанд ямар алба хаагаад хахаж цацатлаа баяжчихваа гэдэг асуудал анхаарал татна. Хөрөнгө мөнгөнийх нь хэмжээтэй гаргаж ирээд шалгахаар шинэчлэлийн бодлого явна л даа.

    Үүний зэрэгцээ шинэчлэлд өртөж байгаа цагдаагийн байгууллага үүрээ хөндүүлсэн шоргоолж шиг бучигнаж эхэлжээ. Тэд шинэчлэлийн бүтэцдээ дасах гэж нэг хэсэгтээ л мунгинах бололтой.

    Өөр нэгэн эх сурвалжийн тайлбарлаж байгаагаар бол цагдаагийн зарим албан хаагчид Хууль зүйн сайд Х.Тэмүүжинд ихээхэн дургүй байгаа гэнэ. Тэдний үзэж байгаагаар бол Х.Тэмүүжин цагдаагийн нэр хүндийг унагасанаас гадна ард түмнийг цагдаагийн эсрэг болгох олон зүйлийг ярьсан аж.

    Ямар ч байсан цагдаагийн байгууллагын шинэчлэл улс төрчдийн шахалтан дунд Хууль зүйн сайдын хэлдэгээр “бодсоноос илүү цаг, хүч шаардах”-аар болчихоод байна.