Нийгмийн бодлого, боловсрол, шинжлэн ухааны байнгын хорооны өнөөдрийн хуралдаанд УИХ-ын гишүүн С.Ганбаатар цалин, тэтгэврийн талаархи Ерөнхий сайд Н.Алтанхуягт тавьсан асуулгын хариуг сонсох байсан ч Ерөнхий сайд өөрийн биеэр оролцсонгүй. Харин түүний оронд Хүн амын хөгжил, нийгмийн хамгааллын сайд С.Эрдэнэ ирсэн ч мөн мэдээлэл хийсэнгүй. Учир нь цалин тэтгэврийн нэмэгдэлтэй холбоотой асуудлыг нээлттэй мэдээлэх юм бол цагаан сараас өмнө үнийн хөөрөгдөл бий болох учраас уг асуудлыг хаалттай хэлэлцвэл мэдээлэл өгнө гэж С.Эрдэнэ сайд хэлэв. Засгийн газрын зүгээс ч ийм чиг үүргийг түүнд өгсөн аж. 

С.Ганбаатар гишүүн Засгийн газрын байр суурийг хүндэтгэж байгаа ч цаашид цалинг ямар аргачлалаар нэмэх гэж байгаа талаар мэдээлэл сонсох хүсэлтэй байгаагаа хэлсний дагуу С.Эрдэнэ сайд товч мэдээлэл хийв.

Цалинг нэмэхдээ инфляцийн өсөлттэй уялдуулан 12.5 хувиар нэмнэ. Ингэхдээ гурван хувилбараар нэмэхээр төлөвлөгөө боловсруулж байгаа гэж С.Эрдэнэ сайд хэллээ. Тэрбээр үүнээс өөр мэдээллийг өгөхөөс татгалзсан учир уг асуулгын хариуг Нийгмийн бодлого, боловсрол, шинжлэн ухааны байнгын хорооны хуралдаанаар ирэх долоо хоногт сонсохоор болж хойшлууллаа.

УИХ-ын гишүүн С.Ганбаатар асуулгадаа “Иргэдийн цалин, тэтгэврийг хэдэн хувиар нэмэгдүүлэх, Монгол Улсын 2014 оны төсөвт тусгахдаа өнөөгийн инфляцийн түвшинтэй харьцуулсан ямар тооцоо судалгаа хийгдсэн болон эмч, багш нарын цалинг олон улсын түвшинд хүргэх талаар Засгийн газраа ямар бодлого, боловсруулж, төлөвлөж байгаа талаар” Ерөнхий сайдаас хариулт авахыг дурьдсан. Мөн  УИХ дахь МАН-ын зүгээс цалин, тэтгэврийг 30 хувиар нэмэгдүүлэх талаар таван хуулийн төсөл Засгийн газарт өргөн барихаар санал авахаар хүргүүлээд байгаа юм. Харин Засгийн газраас энэ онд цалин, тэтгэврийг нэмэгдүүлэхээр 230 гаруй тэрбум төгрөгийг 2014 оны төсөвт суулгаад байгаа билээ.