Говь-Алтай аймагт ажиллаад ирсэн МАН-ын гишүүд сэтгүүлчдэд мэдээлэл хийлээ. Тус аймагт энэ сарын 19-нд буюу нөгөөдөр орон нутгийн дахин сонгууль болно. Дахин сонгууль явуулах болсон шалтгаан нь тус аймгийн сонгуулийн тойргийн хороо нь МАХН-ын нэр дэвшигчдийг бүртгээгүй, иргэдийн сонгох, сонгогдох эрхийг ноцтой зөрчсөнтэй холбоотой.

Тус аймагт 17 тойрогт сонгууль явуулахаас таван тойрогт нь нэр дэвшигчийг, 12 тойрогт нь намыг дугуйлах ёстой юм.

Уг сонгуультай холбогдуулан УИХ-ын гишүүн Б.Чойжилсүрсэн, Л.Энх-Амгалан, Д.Хаянхярваа, Ж.Эрдэнэбат, Ц.Дашдорж нар тус аймгийн бүх сумдаар явж, иргэдтэй  уулзан санал бодлыг сонссон байна. Говь-Алтай аймагт ард иргэдийн амьдрал доройтож, бизнес эрхлэгчдийн бизнес хүндхэн болсон байна. Энэ нь валютын ханшны өөрчлөлт болоод өргөн хэрэглээний бараа бүтээгдэхүүний  үнийн хэт өсөлттэй  холбоотой гэж тус аймагт ажиллаад ирсэн Б.Чойжилсүрэн гишүүн ярив.

Мөн тус аймгийн их, бага дархан цаазтай газарт ашигт малтмал ирж, хайх ашиглах болох эсэх тухай Засгийн газрын хэрэг эрхлэх газрын дарга Ч.Сайханбилэгийн явуулсан албан бичигт иргэд их бухимдалтай байгаа гэдгээ илэрхийлжээ. Харин малчдын зүгээс нийгмийн асуудлыг нь сайжруулсан, тэтгэвэр тэтгэмжийг нь боловсронгүй болгосон хууль гаргаж өгөхийг  хүссэн байна.

Мөн өвлийн хүйтэн цагт тэр дундаа Цагаан сарын баяр болох гэж байхад сонгууль явуулж байгаа нь хүндрэлтэй байна гэж иргэд ярьжээ. Хөдөөгийн малчдын хувьд сонгуулиа өгөхөд хүндрэлтэй байгаагаас эхлээд олон, олон асуудлууд тулгарч байгаа гэнэ.  Энэ нь эргээд сонгуулийн ирц бүрдэхгүй байх магадлалтай аж.

Говь-Алтай аймгийн одоогийн засаг дарга Ш.Амгаланбаярыг сүүлийн 20 жил тус аймгийг удирдаж байгаа гэх мэдээлэл хэвлэл мэдээллийн хэрэгслээр гарч байгаа. Харин энэ талаар МАН-ын гишүүд "Энэ бол ташаа мэдээлэл. Ш.Амгаланбаяр сүүлийн гурван жил тус аймгийг удирдаж байгаа. Мөн Говь-Алтай аймгийг бусад аймгаас хөгжлөөрөө хоцордог гэх мэт ташаа мэдээллийг явуулж байгаа. Энэ бол худал мэдээлэл юм. Тус аймаг нь хар замтай холбогдож байна. Бүх сумд нь гэрэл, цахилгаантай  болсон. Мөн шинээр бүтээн байгуулалтын ажлыг олноор хийж байгаа нь сая явж байхад мэдрэгдсэн" гэлээ.