"Гал үндэстэн холбоо"-ны тэргүүн Ц.Мөнхбаяр тэргүүтэй хүмүүс Төрийн ордны гадна буу, галт зэвсэг, тэсрэх бөмбөгтэй жагсаж, дуулиан тарьсан. Жагсагчид ордны гадна агаарт хий буудсанаас гадна нэр бүхий хоёр газарт тэсрэх бөмбөг хадгалсан байсныг хууль, хүчнийхэн аюулгүй болгосон билээ. Ц.Мөнхбаяр тэргүүтэй хүмүүсийн уг үйлдлийг шүүх хурал удахгүй болно.

Ч.Мөнхбаяр нь өмнө нь нум, сумтай жагсаал зохион байгуулж мөн л Төрийн ордон руу харваж байсан хүн. Тэрбээр удаа дараа ийм үйлдэл хийснийхээ төлөөр ямар хариуцлага хүлээх нь одоогоор тодорхойгүй байгаа.

Ч.Мөнхбаярын ингэж жагсах болсон шалтгаан нь эх орон, уул усаа хамгаалж яваагийн нэр гэж хүмүүс үздэг. Гэхдээ түүний арга барил хэзээд буруу байдаг гэдгийг ч хүмүүс хэлнэ. Хэрвээ түүнийг буудахад тэнсэн суманд хэн, нэгэн хүн оногдсон бол яах байсан бэ? Мөн тавьсан бөмбөг нь дэлбэрсэн бол олон хүний аминд хүрч, хэдэн зуун сая төгрөгний эд материал үгүй болох байсан. Энэ мэт түүний үйлдлийн үр дагавар нь ойрын хэдэн жилдээ дуулдахааргүй гарц, хохирол байх байсан ч юм билүү. Бид мэдэхгүй шүү дээ. Нөгөө талаас тэрбээр хуулийг маш бүдүүлгээр зөрчсөнөөс гадна цөөхөн монголчуудыг бие, биенээ алж, хядахад уриалж буруу үлгэр дууриалал үзүүлсэн хүн.

Гэтэл хууль зөрчиж, хүний аминд хүрэх дөхсөн нөхрийг манай хууль батлагчид өмөөрч, дэмжиж байна. УИХ-ын гишүүн Г.Уянга, Ч.Мөнхбаяр нарыг батлан даалтад гаргах санал хүргүүлсэн. Гэтэл саяхан С.Ганбаатар гишүүн Ч.Мөнхбаярыг өмөөрч, Төрийн ордон руу буудсан нь бараг л зөв гэх юм ярив. Бас болоогүй түүнийг үнэхээр эх оронч, эх орныхоо төлөө сэтгэл нь өвдөж явдаг сайхан Монгол залуу гэв. Тэрбээр Ч.Мөнхбаярын талаар үргэлжлүүлэн ярихдаа “Мэдээж бид хамтдаа тэмцэж явсан. Тэмцлийн арга барилын хувьд гэх юм бол бид хоёрынх зөрдөг байсан. Бие биеэ хатуу ширүүн шүүмжилж байсан үе бий. Гэхдээ биднийг  үр хүүхдүүддээ сайхан Монгол эх орныг үлдээх юмсан гэдэг үзэл бодол маань нэгтгэдэг. Миний байр суурь бол хэлэлцээр, зөвшилцөл ойлголцлын л зам юм. Энэ зарчмаа би одоо ч дээдлэдэг. Ч.Мөнхбаярын хувьд буруу биш” гэж хэлэв.

Нөгөө хууль сахихыг бусаддаа үлгэрлэж явдаг С.Ганбаатар гишүүн маань хууль зөрчигчийг ингэж өмгөөлж байгаа нь үнэхээр олны дургүйцлийг хүргэж байна. С.Ганбаатар гишүүний хэлж буйгаар бол хэн дуртай нь Төрийн ордон руу гаа буудаад, хаана ч хамаагүй тэсрэх бөмбөг тавьж болох юм байна. С.Ганбаатар гишүүн Ч.Мөнхбаярын үзэл бодлыг өмөөрч болох ч, хийсэн үйлдэлтэй нь эвлэрч болохгүй л баймаар санагдана.

Гэтэл Ч.Мөнхбаярын хийсэн үйлдлийг “Тэр хүн олон жил “Онги гол” гэж уул усаа ярьж яваа хүн. Тэр хүнийг хэзээ ч сонсдоггүй, үл ойшоодог хүмүүсийн анхаарлыг татахын тулд хурц ширүүн арга хэмжээ авсан байхыг үгүйсгэхгүй. Ярьж байгаа зүйлийг нь анхаарч сонсох хэрэгтэй байсан. Тэр хүнийг буруутгаж л байгаа юм бол тийм байдалд хүрэхээс өөр аргагүй байдалд ортол нь дүлий дүмбэ оргисон шийдвэр гаргагчид, Засгийн газар бас буруутай” гэх мэтээр ярьж байна.

Хэрвээ бид ардчилсан оронд амьдарч байгаа бол хуулиа сахих л ёстой. Мөн хууль сахихад нь УИХ-ын гишүүд нь уриалан дуудаж, өөрсдийн биеэр үлгэрлэл болох ёстой санагдана. Гэтэл тэдгээр нөхөд нь ийм зүйл яриад явахаар чинь яаж Монгол улс замбараатай, цэгцтэй, аюулгүй зөв хөгжих вэ?