Говь-Алтай аймагт болсон ИТХ-ын нөхөн сонгуулиар АН илт давуу ялж түүхэндээ бууж үзээгүй “улаан туг”-ийг сольж цэнхэр далбаа намирууллаа хэмээн хэвлэл мэдээллийн хэрэгслүүдээр шуугих болов. Үүнээс шалтгаалан уншигч, үзэгчдэд Говь-Алтай аймагт тэр чигтээ АН ялж байгаа мэт сэтгэгдэл төрөх болжээ.

Гэхдээ нөхөн сонгууль зөвхөн таван тойрог, намын нэрийн 12 мандатад явуулсан юм. Тус аймгийн Иргэдийн төлөөлөгчдийн хурал нь 35 суудалтай. Нөхөн сонгууль явуулаагүй 18 суудлын 12 нь МАН-д хадгалагдаж буй. Үлдсэн суудалд АН-ын гишүүд байгаа. Энэ сонгуулиар АН 11 суудал, МАН дөрвөн суудал, МАХН хоёр суудал авчээ. Ингээд нийт суудлын 17 нь АН, 16 нь МАН, хоёр нь МАХН-ынх болов.

Үүнээс харахад АН ердөө ганц суудлын илүүгээр олонхи болж байна. Хэрэв зээ тоглолт явуулж МАХН, МАН намын гишүүд эвсэх тухай шийдвэрт хүрвэл мөн л нэг суудлын илүүгээр тус хоёр намын эвсэл олонхи болох юм. МАН-ын гишүүдийн дотор тус хоёр намыг угсаа гарвал нэгтэй эвсэж нэгдэх нь зүйтэй гэж үзэх хүн бишгүй олон бий. Эрх мэдлийн төлөөх тохироо тоглолт цаашид яаж ч өрнөж мэдэх учир яаран дүгнэлт хийх хараахан болоогүй байна.