Эдийн засгийн байнгын хорооны өнөөдрийн хуралдаанаар хэлэлцэхээр төлөвлөсөн эхний асуудал нь Газрын тосны тухай хуулийн шинэчилсэн найруулга, Газрын тосны тухай хуулийг дагаж мөрдөх журмын тухай болон холбогдох бусад хуульд нэмэлт, өөрчлөлт оруулах тухай хуулийн төслүүдийн анхны хэлэлцүүлэг байлаа. Эдгээр хуулийн төслийг анхны хэлэлцүүлэгт бэлтгэх ажлын хэсэг Даваа гаригт хуралдах байсан ч ирц бүрдээгүй шалтгаанаар хуралдаан болоогүй байна. Тиймээс энэ асуудлыг хэлэлцэх асуудлын дарааллаас хасаж өгөх хүсэлтийг Ажлын хэсгийн ахлагч Х.Болорчулуун тавьсан учир хэлэлцэхийг хойшлууллаа.

Дараагийн асуудал нь Ашигт малтмалын тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлэг байв. Гишүүд Монголбанк, түүнээс эрх олгосон банкинд худалдсан алтанд ногдуулдаг нөөц ашигласны төлбөрийн хэмжээг 2.5 хувь болгон бууруулахаар оруулж ирсэн заалт зөв, буруу эсэх талаар нэлээд нухацтай ярилцсан. Уул уурхайн сайд Д.Ганхуягийн тайлбарласнаар, Монголбанкинд тушаасан алтны нөөц ашиглалтын төлбөрийн хэмжээ 2.5 хувь, хэрвээ тушаагаагүй бол дээрх төлбөрийн хэмжээ 10 хувь байхаар төсөлд тусгахаар Ажлын хэсгээс саналын томьёолол оруулж ирсэн байна. Ингэснээр алтны тушаалт нэмэгдэж, валютын нөөц өсөн, ханш нь тогтворжих ач холбогдолтой гэлээ. Хуралдаанд оролцсон гишүүдийн олонх Ажлын хэсгээс, “47.3.3. Монголбанк, түүнээс эрх олгосон банкинд худалдсан алтанд энэ хуулийн 47.3.2-т заасан нөөц ашигласны төлбөрийн хэмжээ 2.5 хувь, энэ хуулийн 47.5-т заасан нэмэлт төлбөрийн хэмжээ 0 хувьтай тэнцүү” гэж өөрчлөн найруулан оруулж ирсэн саналыг дэмжсэн юм. Түүнчлэн Д.Ганхуяг, Н.Батбаяр нарын гишүүдийн оруулж ирсэн дээр дурдсан заалтыг батлагдсан өдрөөс нь таван жилийн хугацаанд дагаж мөрдөнө гэсэн саналын томьёолол мөн олонхын дэмжлэг авсан юм. Гишүүд Ажлын хэсгээс бэлтгэсэн саналын томьёоллуудаар санал хураалт явуулж дуусан чуулганы нэгдсэн хуралдаанаар анхны хэлэлцүүлгийг хийхээр тогтлоо. Мөн хуралдаанаар Эрдэнэсийн сангийн 2014 оны орлого, зарлагын төлөвлөгөө батлах тухай УИХ-ын тогтоолын төслийг хаалттай горимоор хэлэлцлээ.