Хуулийн салбарын шинэчлэлийг хүмүүс янз бүрээр л ярьж байна. Зарим нь өөрчлөх цаг нь болсон гэж байхад нөгөө хэсэг нь өөчрлөх шаардлагаггүй зүйлээр оролдож хамаг юм будлиантууллаа гэх юм. Тэр дундаа хуулийн шинэчлэлээс болж хуулийн салбарынхан өөр хоорондоо муудалцаж эхэлсэн нь иргэдийн гайхширлыг төрүүлсээр. Хэдхэн хоногийн өмнө Д.Дорлигжав прокурор, Х.Тэмүүжин сайдыг зад шүүмжлээд авсан. Гэтэл түүний дараахан Ц.Нямдорж гишүүн бас л ширүүхэн хэдэн үг чулуудчихлаа. Ийн тэдний маргааныг ажиглаж байгаа иргэд "Ингэж байхаар олон түмний өмнө шударга мэтгэлцэх хэрэгтэй шүү дээ" гэж сууна. Тэдний ч зөв байх. Юу нь болохгүй, аль нь зөв болоод байгааг олон нийтийн өмнө хэлж, ярьж, мэтгэлцэх хэрэгтэй. С.Ганбаатар, С.Баярцогт гишүүд ч ийн маргалдасны эцэст иргэдийн өмнө, хэвлэл мэдээллийн хэрэгслээр мэтгэлцсэн. Үүний дараа хэн нь хэн бэ гэдгийг ч иргэд өөр өөрийнхөөрөө тунгаах болсон. Тэгвэл тэдэн шиг Х.Тэмүүжин сайдыг Ц.Нямдорж гишүүн, Д.Дорлигжав прокурор нартай мэтгэлцэх хэрэгтэй гэх хүмүүс олон байна.

Х.Тэмүүжин сайдын хувьд хуулийн салбарын шинэчлэлийг заавал хийх ёстой гэж үзээд байдаг. Гэтэл Ц.Нямдорж гишүүн өөрийгөө энэ шинэчлэлийг аль хэдийнэ хийчихсэн гээд зүтгээд байгаа нь нууц биш. Тэрбээр "Шинэчлэл гээд байгаа юмыг чинь би Хуульзүйн сайдаар арваад жил ажиллахдаа хоёр үе шаттай хийчихсэн. 1992, 2002 ондп хуулийн шинэчлэл бүрэн хийгдсэн. Үндсэн хуулийн хүрээнд хийсэн маш том шинэчлэл байсан. Эдний одоо хийх гээд байгаа шинэчлэл бол 2002-2003 оны шинэчлэлийн хүрээнд хийсэн ажлын байруудыг солиод тэрийгээ шинэчлэл хийлээ гэж автор зүүх гэсэн оролдлого. Харамсалтай нь энэ бүхэн нь байдлыг улам л дордуулж байна.Ганцхан жилийн дотор шүүхийн захиргааны аппаратыг ийм олон орон тоотой болгох хуулийн шаардлага байхгүй. Хэрэгцээний ч шаардлага байхгүй. Зүгээр л хэдэн хүнийг ашигтай болгох эрх ашгийн үүднээс ийм Шүүхийн яам хүртэл гарч ирлээ. Сүүлийн үед Засгийн газраас Х.Тэмүүжингийн оруулж ирээд байгаа юмнууд бол манайд огт байдаггүй далайн эрх зүйн систем гэдэг зарчмыг дагадаг Англи, Америкийн системийн дутуу судлагдсан хувилбар. Энэ бол манайд огт судлагдаагүй" гэв.

Ц.Нямдорж гишүүн Х.Тэмүүжин сайдын хэлж яриад байгаа зүйлийг манайд огт байдаггүй далайн эрх зүйн системийн зарчмыг дагадаг Англи, Америкийн системийн дутуу судлагдсан хувилбар гэлээ. Тэгвэл энэ үг иргэдийн гайхширлыг улам ихээр төрүүлэв. Тиймээс ч тэднийг иргэдийн өмнө нь хэн нь зөв, хэн нь худал яриад байгаагаа хэлж мэтгэлцэхийг шаардаж эхэллээ.