Хамтын тэтгэврийн тухай хуулийн төслийг хэлэлцэх эсэх асуудлыг өнгөрсөн долоо хоногийн  чуулганаар хэлэлцэх ёстой байсан. Гэтэл МАН-ын бүлгийн зүгээс завсарлага аваад байгаа. Ардчилсан намын бүлгийн өнөөдрийн хурлаар Хамтын тэтгэвэрийн тухай хуулийн төслийн талаар дахин хэлэлцэж гишүүдийн зүгээс дэмжиж байгаагаа илэрхийлэв. АН-ын бүлгийн дэд дарга С.Одонтуяа энэ талаар "МАН-ын бүлгийн ярьж байгаа шиг улсын төсөвт ямар нэгэн ачаалал үүсэхгүй. Яагаад гэвэл нас барсан тохиолдолд хамтын тэтгэвэр олгох асуудал яригдана. Нөгөө талаар тухайн хүн тэтгэвэрийн шимтгэлээ олон жилээр төлөөд явж байсан учраас төсөвт хүндрэл үүсэхгүй. Гэхдээ энэхүү хуулийн төслийг өргөн барьчихсан байгаа учраас намын бүлгүүд, байнгын хороогоор хэлэлцэх явцад гишүүд өөрсдийн байр сууриа илэрхийлж санал шүүмжийг аваад л явна шүү дээ. Өнөөдрийн байдлаар 412 мянган иргэн тэтгэвэрт авдгаас 220 мянган бүрэн тэтгэвэрт хамрагддаг. 76 мянган иргэн хамтын тэтгэвэрт хамрагдах урьдчилсан тооцоо бий" гэв. Харин хэрэгжиж эхлэх хугацааг хэрхэн товлож байгааг тодруулахад "Иргэдийн хувьд хугацааны талаар их сонирхож байгаа. Өмнөх жилүүдийг тооцох талаар ч санал гаргаж байна. Гэхдээ аливаа хуулийн хэрэгжих хугацаа буцаж биш батлагдсан өдрөөс эсвэл тодорхой хугацааны дараа мөрдөгддөг" гэлээ.