Ардчилсан намын олонхи бүрдүүлж байгаа УИХ, Шинэчлэлийн Засгийн газарт утаагүй зуухаа зарсан айлуудаас өөр анхаарах зүйл бага байгаа бололтой. Ерөнхий сайд сар шинийн өмнөхөн утааны хэлэлцүүлэг хийж орон даяар шууд нэвтрүүлэг цацсан. Ингэхдээ утааг шийдэх шинэлэг арга технологи, дэд бүтэц, цахилгаан станц, барилгажуулалтын асуудал бараг хөндөөгүй. Харин зуухаа үхрээр сольсон хүний тухай л их ярьсан.  Засгийн газар дээр сайд дарга нар, эрдэмтэн мэргэдийг цуглуулаад яаж Улаанбаатарын утааг арилгах вэ гэж 18 удаа хэлэлцээд айл өрхүүд галаа зөв түлж чадахгүйгээс Улаанбаатар утаатай байна гэсэн дүгнэлт хийсэн байдаг. Ингээд зарсан зуухуудаа олж авах үүргийг хотын удирдлагуудад өгсөн билээ. Нийслэлийн засаг дарга Э.Бат-Үүл “зуух зарахыг гэмт хэрэгт тооцно” гэж мэдэгдэхэд төдийлөн олон хүн анхаараагүй. Тэгвэл энэ хэлсэн үгийг бататгаж УИХ-ын дарга З.Энхболд МҮОНТВ-ийн сэтгүүлч Ш.Гүрбазарын “Та хариулахгүй байсан ч болно”  нэвтрүүлэгт нэгэн хачирхалтай мэдэгдэл хийлээ.

Тодруулбал “утаа гаргадаггүй зуухыг нэг хэсэг айл зараад идсэн. Үхэр болгоод идэш хийсэн байна лээ. Ийм улсуудыг Улаанбаатараас албадан гаргая” гэв. Энэ бүхнээс үзэхэд Ерөнхий сайд, Хотын дарга, УИХ-ын дарга ч зуухаа зарсан айлуудад хатуу хариуцлага тооцох нь тодорхой боллоо.

Ялангуяа УИХ-ын дарга З.Энхболд гэр хорооллынхонд бараг дайн зарлалаа гэхэд болно. Тэрээр Улаанбаатараас албадан гаргах санаагаа хэлэхдээ “Манай гамшгийн хуулинд утааг гамшиг гэж тооцдоггүй, албадая гэхээр болдоггүй” гэж санаагаа хэрэгжүүлэх арга механизмаа танилцууллаа.

Хэдийгээр зуухаа зарсан айлуудыг зөвтгөх аргагүй ч оршин суух газраа чөлөөтэй сонгох үндсэн хуулиар олгогдсон хүний эрхэнд ардчилагчид гар дүрж эхэллээ. Хамтарч 8, дангаараа 6 дахь жилдээ  засаг барьж байгаа АН-ын үед Улаанбаатарын утаа ийм байдалд орсон. Энэ хариуцлагыг АН өмнөх Засгийн газар, хотын удирдлагуудтай хамт үүрэлцэх ёстой. Тийм ч учраас хариуцлагыг эхлээд ард иргэдээс бус төр засаг өөрөөсөө эхлэх нь зүйтэй мэт.  Гэтэл дэлхий даяараа туршаад бүтэлгүй болохыг нь нотлосон шахмал түлш, зуухны аргаар утааг шийдэх гэж оролдсон механизмдаа дүгнэлт хийхгүй атлаа  түүнийг  хүсэлд нь тааруулж ашиглаагүй ард иргэддээ хариуцлага тооцох тухай ярьж байна.

Ийнхүү УИХ-ын дарга З.Энхболд зуухаа зарсан айлуудын жагсаалтыг гаргаж Улаанбаатараас хөөх ажиллагааг удирдахаар боллоо. Харин ард иргэдэд үүнийг харж, үр дүнд нь Улаанбаатарыг утаагүй болгохыг харах л үлдэх шив дээ.