“Гар цэвэр” аваргын маань “нэр цэвэр” явдалд тун бүдүүлгээр халдаж МАХН-руу орох нь гэсэн мессеж хэвлэлээр хэсэг шуугиулсан. Харин Б.Бат-Эрдэнэ аварга маань энэ талаар “Би МАХН-д орохгүй, намайг гүтгэж байна. Тийм зүйл огт яриагүй” гэж мэдэгдсэн. Үүнээс үзэхэд аваргыг маань хүн гүтгэж, эсвэл аварга маань хүнийг гүтгэсэн болж таарав.

    Цагийг эзэлсэн их аваргыг маань улс төрд хөтлөн оруулсан хүн бол яах аргагүй МАХН-ын дарга Н.Энхбаяр. Түүнийг баривчлах үед аварга маань өөрөө утасруу нь залгаж Н.Энхбаяр ч “Хүрээд ир гэж” дуудаж байсныг Монголын ард түмэн бүгд харсан. Гэвч Н.Энхбаярт үнэнчээ харуулж Д.Тэрбишдагва, Ч.Улаан, О.Чулуунбат нар МАХН-д элсэж байхад Б.Бат-Эрдэнэ гишүүн МАН-д үлдсэн. Эх сурвалжуудын хэлж буйгаар түүнийг МАХН-д элсэхээр нөхдөө уриалаад өөрөө сугарч үлдсэн гэх нь ч бий. Ингэж намдаа үлдсэнээ “Ерөнхийлөгчийн сонгуульд нэр дэвшүүлэхгүй бол МАХН-д элсэнэ” гэж намынхаа нөхдийг шахаанд оруулж МАН ч арга буюу 2013 оны Ерөнхийлөгчийн сонгуульд өрсөлдүүлсэн гэсэн бор шувуу ч нисч байсан. Хэдийгээр энэ бүхнийг тэрээр үгүйсгэдэг ч  МАХН-д орохоор ярьж тохирч явсан нь үнэн болж таарав. Тодруулбал МАХН-ын нарийн бичгийн дарга   П.Ангараг  “Б.Бат-Эрдэнэ гишүүний хувьд намынхаа гишүүнчлэлийг сэргээх тухай яригдаж байсан. Монгол Улсын Ерөнхийлөгчийн сонгуульд МАН-аас нэр дэвшиж байсан хүн намаа солино гэдэг тийм амар шийдвэр биш байх. Энэ үүднээсээ манай намд орох бодлоосоо ухарч байх шиг байна” гэж мэдэгдлээ.  

    Эх сурвалжийн мэдээлж буйгаар сар шинийн өмнөхөн Б.Бат-Эрдэнэ, Ц.Шаравдорж нартай Н.Энхбаяр утсаар ярьсан байна. Н.Энхбаяр УИХ-ын гишүүний давхар дээлийг тайлж өөрөө шадар сайдын нөмрөгтэй болох операци хэдийнээ явуулж эхэлсэн. Ц.Шаравдоржтой намынхаа нарийн бичгийн дарга, эсхүл аль нэг сайд, гишүүний давхар дээлийг тайлж илүүчлэх тохироо хийсэн бол Б.Бат-Эрдэнэ аваргад 2017 оны Ерөнхийлөгчийн сонгуульд МАХН-аас даагаа нэхэхийг санал болгосон гэдэг мэдээлэл ч бий. Н.Энхбаяр  ирэх сонгуульд нэр дэвших боломжгүй. Харин өөрийнх нь ялыг цагаатгаж улс төрийн өндөрлөгт мацах замыг нь дахин тавьж өгөх боломжтой хүмүүсийн нэг бол Б.Бат-Эрдэнэ. Харин Б.Бат-Эрдэнэд МАН дахин боломж олгох магадлал бага. Энэ бүхнээс үзэхэд Б.Бат-Эрдэнэ МАХН-руу орно гэсэн мэдээлэл хэн нэгний зохион үлгэр биш бололтой.

    Гэтэл МАН-ынхан урваж шарвахаараа айлган сүрдүүлж яваа нөхөрөө оны шилдэг улс төрчөөр өргөмжлөн “Алтан сарнайн” эзнээр тодруулсан байдаг. Ерөнхийлөгчийн сонгуульд ялагдсан улс төрчийн карьер ерөнхийдөө дуусдаг. Үгүйдээ л оргил цаг нь тэгээд өнгөрдөг. Гэтэл ялагдсан нэр дэвшигч Б.Бат-Эрдэнэ аваргын карьер өсч дэвжээд, ялагдасныхаа төлөө шагнуулж алга ташуулаад явж байна.. МАН чухам ямар шалгуураар шилдэг улс төрчөө тодруулдаг болсныг гайхаж сонирхох хүн цөөнгүй байна. Эсвэл цагийг эзэлсэн их аваргаа МАХН-руу алдчихгүйн тулд цаасан малгайгаар тойгдож буй хэрэг үү?