Шинэчлэлийн Засгийн газрын сайдууд 11-11 төвд ээлжлэн морилж ажлаа ярих аян үргэлжилж байна. Зурагтын хоймроос салдаггүй тэдний шоуны хэлбэр өөрчлөгдөн янз бүр болох нь төдийлөн сонин биш. Гэвч ийм шоунд сайд дарга нар хамгийн их цаг зарцуулсаар. Яам агентлаг хооронд хамтран ажиллах санамж бичиг зурж ч байх шиг. Төрийн албан тушаалтнууд нэг нь нөгөө албаар орж гарахдаа сэтгүүлчдийг хуйлруулж дагуулаад, гадаадад айлчилж байгаа мэт аяглах нь ард иргэдийн амьдрал ямар ч ач холбогдолгүй. Цагдаагийн газар, хотын захиргаатай хамтран ажиллах санамж бичиг зурлаа ч гэх шиг. Баатар Генерал хоёрын гараа атгалцан марсайтал инээсэн зураг хэвлэлийн хуудаснаа дурайна. Путин Обама биш дээ. Ийм зураггүй, тийм бичиггүй бол хот, цагдаатай хамтран ажиллахгүй гэсэн үг үү. Нэгдмэл төрийн байгууллагууд чиг үүргийн дагуу бүгд л уялдаа холбоотой ажиллах учиртай. Гэтэл  яам агентлаг хоорондоо хамтран ажиллах гэрээ байгуулж, гарын үсэг зурж сэтгүүлчдийн өмнө патераа татуулдаг хачин ёс дэлгэрээд удаж байна. Энэ жишгээр ССАЖЯ-ны сайд Ц.Оюунгэрэл Монгол Улсын Засгийн газрын хэрэг эрхлэх газрын харьяа 11-11 төвд “төрийн өндөр дээд хэмжээний албан ёсны айлчлал” хийжээ. Айлчлалыг манай өдөр тутмын сонин, сайтууд цаг үеийн чухал үйл явдал болгон онцолж, Ийгл ТВ-ээр шууд дамжуулан үзүүлсэн билээ.

    Ингээд айлчлагч сайд бүтэн өдөр буу халж суулаа. Тэрээр нөгөө л Т.Батаарынхаа тухай багагүй яриад, салбарынхаа хөрөнгө оруулалтыг тайлагнаад соёлын өвийг хамгаалах тухай хууль санаачилж буйгаа дуулгасан. Хүн бүхний л мэдэх болсон улиг яриа. Харин тэрээр аялал жуулчлалын салбартай холбоотой шинэ сонирхолтой зүйл ярьсан юм. Сонирхолтой гэж онцлох шалтгаан нь  аялал жуулчлалын салбар бараг мартагдсан дууль болж байгаатай холбоотой. Сайд маань ч аялал жуулчлалаас илүү батаартаа хайртайг бүгд мэдэрсэн. Монгол Улс 2016 он гэхэд 1 сая жуулчин авах зорилттой байгаа. Тэгвэл 1 сая жуулчин хүлээж авахад хүндрэлтэй, аялал жуулчлалын салбар хөгжихгүй байгаа шалтгааныг Ц.Оюунгэрэл сайд жорлон, хогийн савтай түлхүү холбон тайлбарлалаа. Өөрөөр хэлбэл жуулчны баазууд хогийн сав, жорлонгийнхоо асуудлыг шийдэж, бохирын нэгдсэн системд холбогдохгүй бол аялал жуулчлалыг хөгжүүлэхэд тун хэцүү байгаа аж. 1 сая жуулчин ирвэл манай улс хог өтөг ялгадсанд нь дарагдаад сүйрэх юм байх. Тиймээс өтгө ялгадсын үндэсний сүлжээг байгуулж, хөвсгөл далайн кампийг мөрөнтэй холбосон бохирын суваг татахгүйгээр манай улсын аялал жуулчлалыг хөгжүүлэх боломжгүй гэж сайд үзэж, ийм учраас төдийлөн их жуулчин авах тал дээр анхаарахгүй байгаагаа хэллээ. Цаашлаад өөрийнхөө тарьсан хогийг өөрсдөө цэвэрлэж ямар ч жорлон байгуулдаггүй цаст Гималайн туршлагыг сонирхуулав. Гималайд авирч буй хүмүүсийн замд өтгө ялгадсаа гадагшлуулах зориулалттай бидон олныг байршуулаад тэр нь дүүрээд ирэхээр сарлагтай хүмүүс ирээд зөөдөг гэнэ. Ийм жишгээр бол наад зах нь тэрэлжийн ой шугуй, голын эрэг дагуу бидонууд хаяад тэр нь дүүрэхээр морьтой хүмүүс аваад явж болно. Ийнхүү элсэн говьд энд тэндгүй тарааж, хөвсгөл нуурт хөвөгч бидонууд байршуулж өтөг ялгадсын үндэсний сүлжээг байгуулж болох туршлага бийг бидэнд ойлгуулав. Цаашлаад Хубилай хааны үед байсан морин өртөөг эргэж сэргээн жуулчдаа ердийн хөсгөөр зөөж тээврийн хүндрэлээс гарч болохыг сануулав. Төрөөс баримтлах бодлого, жуулчдын аюулгүй байдал, тээвэр, дэд бүтэц, хөрөнгө оруулалт, судалгаа сурталчилгааны тухай тоймтой зүйл ярьсангүй.  Ийм л мэдлэгтэй, мэдрэмжтэй бүсгүй соёл спорт аялал жуулчлалын салбарыг удирдаж байна. Сайд ингэж халин цалгин яриандаа мансуурч суух зуур яамных нь экс газрын дарга хэвлэлээр төрийн нарийн бичгийн даргаа халз зодоонд дуудаж, цаадах нь зодолдохгүй гэдгээ мөн хэвлэлээр мэдэгдэх маягтай ажил нь явагдаж байна.